ՀԱԿ խմբակցության պատգամավորը խճճվել է

ՀԱԿ խմբակցության պատգամավոր, ՎՍԴՀԿ նախագահ Լյուդմիլա Սարգսյանն այսօր լրագրողների հետ զրույցում խոսեց Ընտրական օրենսգրքի նախագծի մասին: Ըստ նրա` ԸՕ նախագիծը խճճված է:

«Ամբողջ աշխարհը գնում է օրենքների պարզեցման, մեզ մոտ այլ ճանապարհով են գնում: Ինձ մոտ տպավորություն կա, որ, 2017 թվականի խորհրդարանական ընտրություններին ընդառաջ, շատ քաղաքական ուժեր անալիտիկ կենտրոն պետք է բացեն, որ հասկանան` ինչը որից հետո է»,- ասաց Սարգսյանը և հավելեց, որ Ընտրական օրենսգրքի նախագծի քննարկման ընթացքում մի քանի հարցեր է ուղղել կառավարության աշխատակազմի ղեկավար-նախարար Դավիթ Հարությունյանին, և այդ հարցերը մնացել են անպատասխան:

«Ընտրագրավի բարձրացման մասին խոսեցի ես, բայց Հարությունյանն ասաց, որ բարձրացում չի եղել: Ընտրացուցակների հրապարակման մասին էլ ասեմ, որ Սահմանադրական դատարանի որոշումը ևս խոչընդոտ չէ, քանի որ չի արգելում, և ընտրացուցակների հրապարակման որոշումը թողնված է իշխանությունների վրա: ՀՀԿ-ն այնպիսի վերահսկողություն է սահմանում ներկայացողների և չներկայացողների վրա, որ վտանգը գալիս է հենց նրանցից: Ընտրատեղամաս եկած քաղաքացին արդեն ընտրատեղամասում ֆիքսվում է»,- ասաց Սարգսյանը:

Նրա խոսքով` ընտրատեղամասերի տեսախցիկը կարելի է տեղադրել այնպիսի բարձունքում, որ որևէ մեկը չկարողանա փակել:

Պատգամավորը խոսեց նաև թանաքոտման մասին և ասաց, որ էլեկտրոնային գրանցման տարբերակին անցնելու դեպքում, ինչ-որ առումով, կարելի է ընդունել այս մեխանիզմը:

«Ազգային փոքրամասնություններին պետք է իր ցուցակի մեջ ներառի այն քաղաքական ուժը, որը հավակնում է լինել առաջինը, և հաստատուն տեղեր պահի նրա համար: Մնացած քաղաքական ուժերին դա պարտադրել չի կարելի: Կոալիցիաների ձևավորումը ևս ինձ մտահոգում է, երեք քաղաքական ուժով է սահմանափակվում, որն ընդունելի չէ»,- ասաց Սարգսյանը: