Ֆրանսիայում վերսկսվել են Հայոց ցեղասպանության ժխտումը քրեականացնող նոր օրենքի պատրաստման շուրջ քննարկումները

Ֆրանսիայի նախագահ Ֆրանսուա Օլանդը հայտարարել է, որ վերսկսվել են Ֆրանսիայում Հայոց ցեղասպանության ժխտումը քրեականացնող օրենքի պատրաստման շուրջ քննարկումները: Այդ մասին նա ասել է Փարիզի l’Hôtel du Collectionneur-ում հունվարի 28-ի երեկոյան տեղի  ունեցած Ֆրանսիայի հայկական կազմակերպությունների համակարգող խորհրդի ամենամյա ընթրիքի ժամանակ, տեղեկացնում է «Արմենպրես»-ը:

Օլանդը տեղեկացրել է, որ  օրենքի նախագծի պատրաստումը վստահել է Մարդու իրավունքների եվրոպական դատարանի նախկին նախագահ Ժան Պոլ Կոստային:

«Հորդորել եմ Ժան Պոլ Կոստային, որը մեր լավագույն իրավաբաններից մեկն է, որպեսզի մեր օրենսդրության մեջ գտնի որևէ ծանրակշիռ ճանապարհ, որն անվիճելիորեն կպաշտպանի Հայոց ցեղասպանության հիշողությունը»,-  ասել է Ֆրանսիայի նախագահը` շեշտելով, որ տեղյակ է,  թե ինչպիսի դժգոհություններ են առաջացել 2012-ին ներկայացված օրենքի չընդունման շուրջ, ուստի եւ կարեւոր է նոր օրենքի անվերապահ սահմանադրականությունը, քանի որ եթե այն բողոքարկեն ՄԻԵԴ-ում, «ապա դա կլինի սարսափելի պարտություն Ֆրանսիայի համար և Հայ դատի ուրացում»:

Օլանդը նաեւ վստահեցրել է, որ Ցեղասպանության ժխտումը քերականացնող օրինագծի ընդունման իր խոստումը որևէ կապ չունի ընտրությունների հետ: