Վալերի Բոյերը Ֆրանսիայի խորհրդարանին Հայոց ցեղասպանության ժխտումը քրեականացնող նոր օրինագիծ է ներկայացրել

Ֆրանսիայի Ազգային ժողովի պատգամավոր Վալերի Բոյերը հայտնել է, որ Հայոց ցեղասպանության ժխտումը քրեականացնող նոր օրինագիծ է ներկայացրել Ֆրանսիայի խորհրդարանին:

«Նոր օրինագիծը ներկայացրել եմ խորհրդարանում: Հուսով եմ, որ օրինագիծը կհայտնվի խորհրդարանի օրակարգում»,- Բոյերի խոսքերն է մեջբերել թուրքական Haberler-ը՝  նրան «թուրքատյաց» ներկայացնելով:

Բոյերը հայտնել է, որ նոր օրինագծի օրինակներն ուղարկվել են Ազգային ժողովի և Սենատի կուսակցական բոլոր խմբակցություններին, և արդեն 40 պատգամավոր համաձայնել է ստորագրել նոր օրինագիծը:

Հիշեցնելով Ֆրանսիայի նախագահ Ֆրանսուա Օլանդի` նախորդ տարվա ապրիլի 24-ին տված խոստումը նոր օրինագիծ ընդունելու վերաբերյալ, Բոյերն ասել է. «Ակնկալում եմ, որ նախագահը տված խոստումը կկատարի»:

Հայտնելով, որ Միջին Արևելքում իրականացվող ցեղասպանությունների ուղղությամբ ևս պետք է օրինագիծ ընդունել, ֆրանսիացի պատգամավորը հավելել է, որ Սիրիայում և Իրաքում ազգային փոքրամասնությունների ու քրիստոնյաների նկատմամբ ցեղասպանություն է իրականացվում: Նա քննադատել է Թուրքիային այդ հարցում նրա դիրքորոշման համար:

Թուրքական կայքը հիշեցրել 2011 թվականին Բոյերի կողմից Ֆրանսիայի խորհրդարանին ներկայացված Հայոց ցեղասպանության ժխտումը քրեականացնող օրինագիծը, որն ընդունվել էր Ազգային ժողովի եւ Սենատի բոլոր խմբակցությունների կողմից 2012-ի հունվարի 23-ին: Սակայն երկրի Սահմանադրական խորհուրդը, պատճառաբանելով խոսքի ազատության իրավունքը, այն հակասահմանադրական էր ճանաչել: