Ժամանակը ցույց կտա. Զախարյանը՝ «Նաիրիտ»-ի վերագործարկման մասին

Այսօր մամուլի ասուլիսով ՀՀ էներգետիկայի ու բնական պաշարների նախարար Երվանդ Զախարյանը ամփոփեց 2015թ. էներգետիկ տարվա ցուցանիշները: Նշենք, որ, ասուլիսին զուգահեռ, նաիրիտցիներն իրենց բողոքն էի հայտնում կառավարության շենքի դիմաց:

Նախարարը նախ նշեց, որ ինքը տեղյակ է, որ նաիրիտցիները ներկա պահին հավաքվել են կառավարության շենքի առջև՝ իրենց բողոքը հայտնելու: Հետո ասաց, որ անցած տարվա ընթացքում լուծվեց «Նաիրիտ գործարան» ՓԲԸ-ի բաժնետոմսերի հետ կապված խնդիրը։ Ընդունվեց կառավարության որոշում Միջպետական բանկի, «Նաիրիտ գործարան» ՓԲԸ-ի և «Ռայնովիլ Փրոփերթի Լիմիթեդ» ընկերության միջև կնքված վարկային և գրավի պայմանագրերով պահանջի իրավունքները «Հայգազարդ» և «Նաիրիտ-2» ՓԲԸ-ներին զիջելու վերաբերյալ: Տարեվերջին ստորագրվեցին այդ պահանջների իրավունքների զիջման պայմանագրերը:

Երվանդ Զախարյանը նշեց, որ «Նաիրիտ» գործարանի ամբողջ գույքի նկատմամբ գրավի իրավունքները Միջպետական բանկից արդեն փոխանցվել են կառավարությանը, և ներկայումս տարվում են կազմակերպչական ու ձևաչափական աշխատանքներ, որոնք մեկ ամսվա ընթացքում կավարտվեն:

«Նաիրիտ»ի վերագործարկման գործում բոլորն են շահագիրգիռ` թե\' նաիրիտցիները, թե\' կառավարությունը, որն անում է ամեն ինչ գործարանը վերագործարկելու համար: Տարվում են բանակություններ վերագործակման ուղղությամբ, բայց թե ի՞նչ արդյունքների կհասնենք, ցույց կտա ժամանակը»,- ասաց Երվանդ Զախարյանը: