Փորձագիտական բացասական եզրակացություն ստացած վերելակները շարունակում են շահագործվել. ՏԿԱԻՆ փորձագետ

ՀՀ ՏԿԱԻՆ տեխնիկական անվտանգության ազգային կենտրոնի գլխավոր փորձագետ Լուսինե Հովհաննիսյանն այսօր լրագրողներին ներկայացրեց 2015 թվականին վերելակների, ճոպանուղիների և ատրակցիոնների պատահարների վիճակագրությունը: Հովհաննիսյանի խոսքով`2015 թվականին վերելակների շահագործման ժամանակ տեղի է ունեցել մեկ արտադրական դժբախտ դեպք, որը մահվան է հանգեցրել:

«Խոսքը Բաշինջաղյան փողոցում մարտի 21-ին տեղի ունեցած դժբախտ դեպքի մասին է, որն ուղեկցվեց մահվան ելքով: Ուրիշ արտադրական դեպքեր` մահվան ելքով, տեղի չեն ունեցել»,- ասաց նա` հավելելով, որ Երևան քաղաքում 5469 վերելակ է հաշվառված, որոնցից 4453-ը բնակելի շենքերում, դրանցից 2015 թվականին փորձաքննության է ենթարկվել 3864-ը, այսինքն` ընդհանուր վերելակների թվի 73 տոկոսը:

Yerkir.am-ի հարցին, թե ինչո՞ւ են ոչ բոլոր վերելակները ենթարկվել փորձաքննության, մասնագետը պատասխանեց, որ ոչ բոլորն են դիմել: Ի դեպ, նա տեղեկացրեց նաև, որ բնակելի շենքերի մեկ վերելակի փորձաքննության արժեքը 2930 դրամ է:

Հովհաննիսյանը նշեց նաև, որ Երևան քաղաքում կան վերելակներ, որոնք փորձաքննության ընթացքում ստացել են բացասական եզրակացություն, բայց շարունակում են աշխատել: Նա այդ ամենը բացատրեց նրանով, որ բարձրահարկ շենքերի բնակիչներն իրենք են դեմ, որ վերելակը դուրս գա շահագործումից, քանի որ բարձր հարկերում ապրող բնակիչները չեն կարողանում տանից դուրս գալ` առանց վերելակի:

Հովհաննիսյանի խոսքով`Աջափնյակ վարչական շրջանում գրանցված 312 վերելակից փորձաքննության ենթարկվել է 158-ը, որոնցից 7-ը ստացել են բացասական եզրակացություն: Արաբկիր վարչական շրջանում գրանցված 465 վերելակներից փորձաքննության ենթարկվել է 361-ը, դրանցից 4-ը ստացել են բացասական եզրակացություն: Ավան վարչական շրջանում գրանցված 314 վերելակից փորձաքննության է ենթարկվել 261-ը, որոնցից 38-ը ստացել են բացասական եզրակացություն: Դավթաշեն վարչական շրջանում 381 վերելակից փորձաքննության է ենթարկվել 302-ը: Այդ վերելակներից 81-ը ստացել են փորձաքննության բացասական եզրակացություն: Էրեբունի վարչական շրջանում փորձաքննության է ենթարկվել գրանցված 207 վերելակից 186-ը: Բացասական եզրակացություն է տրվել դրանցից 5-ին: Քանաքեռ-Զեյթուն վարչական շրջանում 224 վերելակից 181-ը փորձաքննության է ենթարկվել, և բացասական եզրակացություն որևէ մեկի վերաբերյալ չի ստացվել: Կենտրոն վարչական շրջանում գրանցված 779 վերելակից փորձաքննության ենթարկվել է 629-ը, որոնցից 16-ը ստացել է փորձաքննության բացասական եզրակացություն: Մալաթիա-Սեբաստիա վարչական շրջանում փորձաքննության է ենթարկվել գրանցված 938 վերելակից 520-ը: Ստուգվածներից 6-ը ստացել է բացասական եզրակացություն: Նոր Նորք վարչական շրջանում փորձաքննության է ենթարկվել գրանցված 565 վերելակներից 481-ը: Բացասական եզրակացություն այս վարչական շրջանում ստացել է 63 վերելակ: Նուբարաշեն վարչական շրջանում բնակելի շենքերում տեղադրված և գրանցված 6 վերելակներն էլ ենթարկվել են տեխնիկական անվտանգության և փորձաքննության բացասական եզրակացություն դրանցից ոչ մեկին չի տրվել: Շենգավիթ վարչական շրջանում տեղադրված 262 վերելակներից 149-ը փորձաքննության է ենթարկվել, որոնցից 7-ին տրվել է բացասական եզրակացություն:

Անդրադառնալով սեփական տներում տեղադրված վերելակներին` Հովհաննիսյանը նշեց, որ այդ տարածքների վերելակները չեն համարվում արտադրական վտանգավոր օբյեկտներ:

Խոսելով ատրակցիոնների մասին` նա հայտնեց, որ Երևան քաղաքում տեղադրված 83 ատրակցիոններից երկուսը ստացել են փորձագիտական բացասական եզրակացություն, դրանք «Անառիկ Բերդաձոր» կազմակերպության կողմից շահագործվող «Զանգակ» և «Բատուտ» ատրակցիոններն են: Շիրակի մարզում տեղադրված ատրիակցիոններից մեկը ևս ստացել է փորձագիտական բացասական եզրակացություն:

Ճոպանուղիների և շարժասանդուղքների փարձագիտական քննության ժամանակ բացասական եզրակացություններ չեն եղել: