Ինչ էլ լինի, ասելու են՝ հանրաքվեն կեղծվել է. Արմեն Ռուստամյան

Քիչ առաջ 3/23 ընտրատեղամասում իր քաղաքացիական պարտքը կատարեց ՀՅԴ Բյուրոյի քաղաքական ներկայացուցիչ Արմեն Ռուստամյանը:

Նա հայտարարեց, որ քվեարկել է հանուն այն Հայաստանի, որ վաղուց էինք երազում, հանուն սխալները ուղղելու, հանուն նրա, որ իշխանությունը եւ պետությունը չնույնացվեն, եւ վերանա իշխանության ու ժողովրդի միջեւ առաջացած օտարությունը:

«Հանրաքվեի հաջողության դեպքում գործը նոր-նոր սկսվում է: Պետք է սկսենք լուրջ խորքային բարեփոխումներ անել»,- ասաց նա:

Լրագրողների դիտարկմանը, որ ՀԱԿ-ը եւ «Ժառանգությունն» ահազանգում են համատարած ընտրախախտումների մասին, Ռուստամյանն արձագանքեց, որ աղաղակող ընտրախախտումներ իրենք չեն արձանագրել: Իհարկե, ընտրախախտումների մասին ամբողջական խոսելը դեռ վաղ է, ամփոփ կներկայացնեն, երբ քվեարկությունն ավարտվի:

«Կեղծիքներ կլինեն, որովհետեւ իդեալական ընտրությունների մշակույթը մենք դեռ չունենք»,- նշեց նա:

Անդրադառնալով ՀԱԿ-ի եւ «Ժառանգության»՝ համատարած ընտրախախտումների մասին հայտարարություններին, Ռուստամյանն ընդգծեց, որ, քաղաքական առումով, նրանց ձեռնտու չէ, որ Սահմանադրությունը փոխվի, եւ ինչ էլ լինի, մեկ է՝ ասելու են՝ հանրաքվեն կեղծվել է: «Իհարկե, կարեւոր է այս քվեարկության լեգիտիմությունը, բայց այս պահին, ընդհանուր առմամբ, ամեն ինչ նորմալ է»,- ասաց նա:

Կանխատեսել ընտրության ելքը Ռուստամյանը չցանկացավ: Միայն ասաց, որ եթե «այո»-ն չանցնի՝ դարձյալ պայքարելու են: Կոալիցիայի վերաբերյալ լրագրողների ամենանգամյա հարցին էլ ի պատասխան` հիշեցրեց ՀՅԴ-ի հայտնի 7 կետերը եւ հաստատեց. «Մեր սկզբունքներն ամեն օր չեն փոխվում»: