Հայտնի է Հարավային Սուդանում կործանված բեռնատար օդանավի հայ սեփականատիրոջ անունը

Yerkir.am-ն արդեն հայտնել է, որ Հարավային Սուդանում կործանված բեռնատար օդանավի սեփականատերը հայ գործարար է: Մեր հասած որոշ տեղեկություններով՝  նա «Տարոն ավիա» ընկերության տնօրեն Գառնիկ Պապիկյանն է, ով վերջերս էր հայտնվել մամուլի ուշադրության կենտրոնում «Էյր Արմենիա» ավիաընկերության տնօրեն Արսեն Ավետիսյանի հետ կապված միջադեպի պատճառով:

Շրջանառվող տեղեկությունների համաձայն՝ Գառնիկ Պապիկյանը վարձակալական հիմունքներով օդանավը շահագործման էր հանձնել տաջիկական Asia Airways ընկերությանը: Yerkir.am-ը հիշյալ տեղեկությունը փորձեց ճշտել Գ. Պապիկյանից, սակայն նրա հեռախոսն անջատված է: Ամենայն հավանականությամբ, նա Հայաստանում չէ:

Նշենք, որ ՀՀ ԱԳՆ-ն հաստատել է, որ, Եգիպտոսում ՀՀ դեսպանության նախնական տվյալներով, Հարավային Սուդանում վթարի ենթարկված բեռնատար ինքնաթիռի զոհված անձնակազմի անդամներից հինգը ՀՀ քաղաքացիներ են: