Ցանկացած իրավիճակից ելք էր գտնում. մանրամասներ Սուդանում կործանված ինքնաթիռի հայ հրամանատարի մասին

Այս օրերին առավել քան ծանր է Հարավային Սուդանում վթարված ԱՆ-12 բեռնատար օդանավի անձնակազմի զոհված անդամների հարազատների վիճակը, ովքեր սպասում են զոհվածների դիերի տեղափոխմանը:

Yerkir.am-ի հետ զրույցում կործանված օդանավի զոհված հրամանատար Գևորգ Թովմասյանի օդաչու ընկերներից մեկը, խոսելով դեպքի մասին, նշեց, որ միայն նախատեսվածից ավելի բեռի տեղափոխումը չէր կարող նման վթարի պատճառ դառնալ: «Օդաչուն մահապարտ չէ, նա միշտ ինչ-որ տեղ թողնում է, որպեսզի խուսափի պատահարներից»,- ասաց մեր զրուցակիցը՝ ընդգծելով, որ Գևորգի փորձառությունը ոչ ոք չի կարող կասկածի  տակ դնել:

«Շատ համեստ օդաչու էր: Որպես հրահանգիչ՝ շատ գրագետ էր գործում, կուրսանտներին լիարժեք ու հասկանալի բացատրում էր ցանկացած նրբություն: Բոլորը ցանկանում էին նրա հետ թռչել, որովհետև մտածում էին՝ եթե Գևորգն է, ուրեմն կարող են հանգիստ լինել, ցանկացած իրավիճակից նա ելք կգտնի»,- ասաց օդաչուն:

Ավիացիայի ոլորտի ներկայացուցիչների խոսքով՝ Գևորգ Թովմասյանն իր լուման է ունեցել հայկական ավիացիայի ձևավորման գործում: Yerkir.am-ի տեղեկություններով՝ նրա անունը կապված է զինվորական շքերթի ժամանակ տեղի ունեցած մի ուշագրավ  միջադեպի հետ, որից հետո էլ Թովմասյանը լքել է ռազմական ավիացիան:

Գևորգ Թովմասյանը, ռազմական օդաչու եղած տարիներին ծառայություն է իրականացրել Գյումրիում, թռիչքներ է իրականացրել խորհրդային Սու-25»օդանավերով: 2000-ից հետո, որպես օդաչու, աշխատել է  Աֆղանստանում, աֆրիկյան տարբեր երկրներում: