Մինչև տարվա վերջ կունենանք 3-4 տոկոս տնտեսական աճ. Հովիկ Աբրահամյան

Այսօր լրագրողների հետ զրույցում վարչապետ Հովիկ Աբրահամյանը պատասխանել է տնտեսությանը վերաբերող մի քանի հարցերի:

Yerkir.am-ի այն հարցին, թե ինչ կարող է ասել ի պատասխան այն քննադատության, որն այսօր ԱԺ նիստում հնչեցրել են մի քանի պատգամավորներ՝ ԿԲ դրամավարկային տարեկան ծրագիրը քննարկելիս, Աբրահամյանն ասաց. «Ես չեմ կարծում, որ բացասական վիճակ կա, կամ ինչ–որ գործընթաց է ձախողվել: Մենք աշխատում ենք ու մեր խոստումները փորձելու ենք իրականացնել: Իհարկե, աշխարհում ընթացող տնտեսական պատերազմները իրենց բացասական ազդեցությունն ունեն նաև Հայաստանի տնտեսության վրա, նույն Ռուսաստանի լարվածությունը Արևմուտքի հետ, բայց մեր թիմը նախագահի գլխավորությամբ անելու է ամեն ինչ, որ հաղթահարենք այս գործընթացը: Ես կարծում եմ, մենք հասնելու ենք հաջողության»:

Նա կարծիք հայտնեց, որ չորրորդ եռամսյակում երկիրը կունենա ներմուծման ու արտահանման ակտիվություն: Ինչ վերաբերում է ԵՏՄ տարածքում ռազմավարական կարևոր ապրանքները, մասնավորապես էներգակիրների առևտուրը ռուբլով իրականացնելու իր առաջարկությանը, Հովիկ Աբրահամյանը նշեց, որ դա շատ ճիշտ առաջարկ է եղել, դեռ քննարկվում է այդ հարցը, և որ Հայաստանի հասարակությունը չպետք է ակնկալի արագ արձագանք Ռուսաստանից: