5,2 տոկոս տնտեսական աճի փոխարեն՝ 3 տոկոս

ԱԺ-ում 2015թ. բյուջեի քննարկումների ժամանակ ՀՀ ֆինանսների փոխնախարար Պավել Սաֆարյանը, խոսելով տնտեսական աճի մասին, նշեց, որ տնտեսական աճի վրա բացասաբար են անդրադարձել Ռուսաստանի հետ կապված վերջին իրադարձությունները:

«Ծրագրված էր 5,2 տոկոս տնտեսական աճ, բայց մեր ցուցանիշները 3 տոկոսի սահմաններում են, ինչը հետևանք է Ռուսաստանից տրանսֆերտների կրճատման, արտահանումների ու ներդրումների կրճատման, պատժամիջոցների և այլն»,- ասաց նա:

ՀՀ ֆինանսների փոխնախարար Արմեն Ալավերդյանը նշեց, որ օրենսդրական նախաձեռնությունների շնորհիվ բյուջեում աճ է սպասվում, բայց հիշեցրեց նաև այն օրենսդրական նախաձեռնությունների մասին, որոնց պատճառով եկամուտների նվազում է սպասվում: Դրանցից մեկը սահմանամերձ բնակավայրերի հարկային արտոնությունների վերաբերյալ օրենքի նախագիծն է: «Դրա նախնական գնահատականը տրվել է` շուրջ 2,5 միլիարդ դրամ եկամուտների կորուստ և ավելացված արժեքի հարկի փաթեթի հետ կապված՝ 5,2 միլիարդ դրամի կորուստ կունենանք»,- ասաց նա:

Եկամուտների աճի հիմնական շեշտը դրված է վարչարարական միջոցառումների վրա: «Դուք տեղյակ եք, որ հանրապետությունում տասնյակհազարավոր` շրջանառության հարկ վճարողներ ցածր դրույքաչափով պետք է հարկ վճարեն, այն է՝ 3,5-ի փոխարեն 1%, և այդ բացը պետք է լրացվի փաստաթղթաշրջանառության հաշվին, այսինքն` այն միջոցառումը, որը մենք սկսել ենք, պիտի շարունակենք շատ ավելի խորացված 2015 թվականին, պետք է տնտեսվարող սուբյեկտներից՝ խոշորներից, շրջանառությունների աճն այն աստիճանի բարձրացվի, որ դա թույլ տա նրանցից գանձել ԱԱՀ, և այդ թվի նվազագույն սահմանը 12 միլիարդ դրամ լինի»,- նշեց ֆինանսների փոխնախարարը:

Հաջորդ քայլը, ըստ փոխնախարարի, պայանավորված է լինելու խոշոր հարկատուների վճարած հարկային եկամուտներով: