Ո՞վ է ասել` 4,4 տոկոս տնտեսական աճ, ես ասել եմ` 4 տոկոս. վարչապետ

Այսօր ՀՀ վարչապետ Հովիկ Աբրահամյանը, լրագրողների հետ զրույցում պատասխանելով այն հարցին, թե ինչո՞ւ նախարարները չարձագանքեցին իր կողմից հայտարարված` 4,4 տոկոս տնտեսական աճ ունենալու փաստին, ասաց. «Բայց ո՞վ է ասել` 4,4 տոկոս, ես ասել եմ` 4 տոկոս: Եվ հետո` դա իմ ասելով չի, դա ես չեմ հորինել, այդ թվերը հրապարակել է ԱՎԾ-ն»:

Հովիկ Աբրահամյանը նշեց, որ բոլոր նախարարներն էլ համամիտ են իր մոտեցումներին` տնտեսական աճի հետ կապված, պարզապես լրատվամիջոցների հարցը հետևյալն է` թե ինչո՞ւ այդ տնտեսական աճը չի երևում մարդկանց սոցիալական կյանքում. եթե 4 տոկոս տնտեսական աճ է, ուրեմն պետք է մարդիկ լավ ապրեն: «Որպեսզի մարդիկ լավ ապրեն, մեզ պետք է տնտեսական աճի երկնիշ թիվ, և մենք կամաց-կամաց փորձում ենք գնալ դեպի աճ և փորձում ենք մեր դիրքերն ամուր պահել տարածաշրջանում»,- ասաց վարչապետը:

Լրագրողների դիտարկմանը, թե ֆինանսների նախարարը հակառակն է պնդում, վարչապետը հակադարձեց. «Մի հատ Գագիկ Խաչատրյանին կհարցնեք, տեսնեք` հակառա՞կն է պնդում, թե՞ ոչ»: