«Վերնիսաժ»-ի գործով երեք ամբաստանյալները հրաժարվեցին ճառից

Կենտրոն և Նորք-Մարաշ վարչական շրջանների ընդհանուր իրավասության դատարանում 2014թ. մայիսի 17-ին Վարդանանց փողոցում՝ «Վերնիսաժ»-ի մոտ, հնչած կրակոցների գործով երեք ամբաստանյալները հրաժարվեցին պաշտպանական ճառից:

Հիշեցնենք, որ այսօր մեղադրող դատախազը միջնորդել էր ամբաստանյալ Գոռ Առաքելյանին դատապարտել 9 տարի, Վալերի Հովհաննիսյանին` 2 տարի 6 ամիս, իսկ Ներսես Մելքոնյանին` 2 տարի ժամկետով ազատազրկման:

Ներսես Մելքոնյանի պաշտպան Վարդուհի Էլբակյանն ասաց, որ չեն ցանկանում օգտվել ճառով հանդես գալու իրենց իրավունքից: «Ընդամենը խնդրում եմ Ներսես Մելքոնյանի նկատմամբ դատական ակտ կայացնելիս հաշվի առնել նրան բնութագրող և կենսագրական տվյալները, որոնք դատաքննության ընթացքում արդեն իսկ հետազոտվել են»,- նշեց նա:

Ամբաստանյալ Վալերիկ Հովհաննիսյանի պաշտպան Արայիկ Ալվանդյանն ասաց, որ Վալերիկ Հովհաննիսյանը պետք է արդարացվի, նրա նկատմամբ ընտրված խափանման միջոց կալանավորումը պետք է փոխվի: Նրա խոսքով՝ Վալերիկ Հովհաննիսյանն այս գործով չպետք է մեղադրվեր, նրան մեղադրանք չպետք է առաջադրվեր: «Նա ընդամենը տուժող է»,- շեշտեց փաստաբանը: Նա դատարանին հորդորեց հաշվի առնել այն հանգամանքը, որ իր պաշտպանյալը խնամքի տակ ունի հաշմանդամություն ունեցող մայր: