Մենք կյանք չենք տվել, ոչ էլ կարող ենք խլել. Երրորդմասցի Լյովիկի սպանության գործով ամբաստանյալները ցուցմունք տվեցին

Էրեբունի և Նուբարաշեն վարչական շրջանների ընդհանուր իրավասության դատարանում, դատավոր Արտուշ Գաբրիելյանի նախագահությամբ, շարունակվեց քրեական հեղինակություն Երրորդմասցի Լյովիկի և նրա երկու ընկերների սպանության գործով հերթական դատական նիստը:

Այսօրվա դատական նիստում գործով երեք ամբաստանյալները ցուցմունք տալու պատրաստակամություն հայտնեցին՝ ասելով, որ իրենց մեղավոր չեն ճանաչում: Մասնավորապես` այս գործով ամբաստանյալ Վահան Հակոբյանը՝ Գաստիկը, հայտարարեց. «Ես հանցագործություն չեմ կատարել, ես սպանություն չեմ կատարել»: Նույնը կրկնեց գործով ամբաստանյալ Սարգիս Հախանումյանը: Իսկ ամբաստանյալներից Սարգիս Գրիգորյանն ասաց. «Մենք սպանություն չենք կատարել, մենք կյանք չենք տվել, ոչ էլ կարող ենք խլել»:

Երեք ամբաստանյալներն էլ, օգտվելով իրենց դատավարական իրավունքից, հրաժարվեցին մեղադրող դատախազի հարցերին պատասխանել:

Մեղադրող դատախազը դատարանից ժամանակ խնդրեց միջնորդություն ներկայացնելու համար: Այդ հիմքով էլ այսօրվա դատական նիստը հետաձգվեց:

Նշենք, որ, համաձայն մեղադրական եզրակացության, 2015թ. մարտի 4-ին` ժամը 13:50-ի սահմաններում, Վահան Հակոբյանը (Գաստիկ), Սարգիս Հախանումյանը (Տլեն) և Սարգիս Գրիգորյանը (Ծգլ), նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, ինչի հետևանքով ստացված հրազենային վնասվածքներից Մ.Նազարյանցը` տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են: