New York Times-ը դատապարտել է թուրքական Hurriyet թերթի վրա հարձակումը

Ամերիկյան հայտնի New York Times պարբերականը դատապարտել է թուրքական Hurriyet թերթի վրա հարձակումը:

Ըստ Hurriyet-ի` New York Times-ը «Թուրքիայի ընդդիմադիր լրատվամիջոցները հարձակման են ենթարկվում» վերնագրով հոդված է հրապարակել, որում ներկայացվել է, թե ինչպես Թուրքիայի նախագահ Էրդողանի՝ Hurriyet-ին ուղղված քննադատություններից հետո նրա մի խումբ կողմնակիցներ հարձակվել են թերթի կենտրոնական գրասենյակի վրա, կոտրել ապակիները, հայհոյել և փորձել ներխուժել շենք:

Հոդվածագրի խոսքով՝ թուրքական թերթի դեմ այս հարձակումն ընդդիմադիր մամուլի հանդեպ հետզհետե մեծացող հարձակողական արշավի մի մասն է:

Պարբերականն իր հոդվածում անդրադարձել է նաև վերջին շաբաթների ընթացքում Թուրքիայից երեք օտարազգի լրագրողի արտաքսման, Էրդողանին վիրավորելու մեղադրանքով մի շարք քաղաքացիների դեմ սկսված հետաքննությունների, Nokta ամսագրի և ընդդիմադիր լրատվամիջոցների՝ ճնշումների ենթարկվելու, ինչպես նաև դրանց ղեկավարների՝ ահաբեկիչների հետ համագործակցելու կասկածանքով հարցաքննվելու փաստերին:

Հոդվածագրի խոսքով՝ «Լրագրողներն առանց սահմանի» կազմակերպության՝ մամուլի ազատության վերաբերյալ կազմած ցուցակում Թուրքիան 180 երկրների  շարքում 149-րդ տեղն է զբաղեցնում: