Հայաստանից տարեկան հեռանում է 30 հազար մարդ. ո՞վ է կերակրելու կենսաթոշակառուներին

Այսօր ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը և ժողովրդագիր Ռուբեն Եգանյանը լրագրողներին ներկայացրեցին Հայաստանի ժողովրդագրական պատկերի վերաբերյալ ՄԱԿ-ի` 2015թ. նոր զեկույցը: 

Գարիկ Հայրապետյանի խոսքով` ըստ ՄԱԿ-ի կանխատեսումների` Հայաստանի բնակչությունը մինչև 2100 թվականը կազմելու է 1,8 միլիոն մարդ: Նա անդրադարձավ շատ լուրջ, բացասական ու մտահոգիչ մի գործոնի` աջակցության կանխատեսվող գործակցին: Դա աշխատող բնակչության և կենսաթոշակառուների թվի հարաբերակցությունն է:

 «Եթե այսօր մեկ կենսաթոշակառուին բաժին է ընկնում 5,4 աշխատող, ապա 2100-ին, դրական կանխատեսմամբ, մեկ կենսաթոշակառուին բաժին կհասնի 2,4 աշխատող, իսկ բացասական կանխատեսմամբ` 1-ը 1-ի հարաբերակցությամբ: Սա բավական լուրջ ու մտահոգիչ խնդիր է, որովհետև կհանգեցնի շատ մեծ սոցիալական բեռի աշխատող բնակչության վրա, որը չի կարողանալու ապահովել արժանապատիվ կենսաթոշակային տարիք»,- ասաց Գարիկ Հայրապետյանը` հավելելով, որ Հայաստանում պետք է քննարկման առարկա դառնա այն  հարցը, թե ինչպես պետք է իրականացնել կենսաթոշակային բարեփոխումները, որովհետև ներկայիս մեխանիզմը էլ չի աշխատելու:

 Ինչ վերաբերում է բնակչության թվի նվազման մյուս կարևոր գործոնին` միգրացիային, ապա միջին հաշվարկով այն կազմում է տարեկան 25 հազար մարդ` մեկնողների և եկողների բացասական սալդոն,  և 2100-ին այդ թիվը կկազմի 12 հազար մարդ` տարեկան:

 Խոսելով Հայաստանի ժողովրդագրական պատկերի մասին` նշվեց, որ ծնելիությունը բավականաչափ անկում է ապրել, սեռերի հարաբերակցությունը այսօր կազմում է 68 տղամարդ-100 կին, սակայն երեխայի սեռի ընտրությամբ ծնելիության պարագայում ապագայում տղաների թիվն ավելի է մեծանալու:

 Ռուբեն Եգանյանը նշեց, որ իր կանխատեսումներով` Հայաստանի բնակչության թիվը 2050-ին կազմելու է մոտ 1,3 միլիոն մարդ: Նա նշեց, որ բացասական կանխատեսումները փոխելու ուղղությամբ Հայաստանում քայլեր չեն ձեռնարկվում, դրա փոխարեն փորձ է արվում հնարավորինս ուռճացնել ու ստանալ ցանկալի ժողովրդագրական պատկեր:

 «Տարեկան ունենք նվազագույնը ոչ թե միջինացված 25 հազար, այլ 30 հազար մարդու արտահոսք»,- ասաց նա` հավելելով, որ հենց արտահոսքն է կանխորոշելու բնակչության թվի նվազումը:

Գարիկ Հայրապետյանի խոսքով` Հայաստանում  միգրացիան շարունակելու է գործոն լինել այնքան ժամանակ, քանի դեռ Հայաստանում ապագա չտեսնող ազգաբնակչությունը կկարողանա աշխատանք ու ապագա տեսնել աշխարհի այլ վայրերում: