Հայ անվանի վիրաբույժը 1915-ի ապրիլին ձերբակալվել է, բանտարկվել ու սպանվել

Ծնվել է 1875 թ., Խարբերդի նահանգի Դերսիմի գավառի Խոզաթի գավառակի կենտրոն Խոզաթ ավանում կամ Մելիտինեում:

Նախնական կրթությունն ստացել է ծննդավայրի թաղային վարժարանում:

1894 թ. ավարտել է ամերիկացի միսիոներների Խարբերդի Եփրատ քոլեջը: 1898/99 թ. ավարտել է Բեյրութի Ամերիկյան համալսարանի բժշկական ֆակուլտետը:

1899 թ. վերադարձել է Խարբերդ և բժիշկ աշխատել:

1900 թ. մեկնել է ԱՄՆ և վիրաբուժություն ուսանել Բալթիմորի և Յեյլի բժշկական համալսարաններում:

1901 թ. ԱՄՆ-ի Ջոն Հոփքինս հիվանդանոցում վիրաբույժի օգնական է աշխատել:

1901 թ. աշնանը վերադարձել է Թուրքիա և Կ. Պոլսում մասնագիտական քննությունները հանձնելուց հետո վերադարձել Խարբերդ:

Կարճ ժամանակ անց դարձել է Խարբերդի անվանի վիրաբույժը, տեղի կառավարչի և երևելի անձանց ընտանեկան բժիշկը:

1911 թ. դրությամբ աշխատել է Խարբերդում:

1915 թ. ապրիլին Խարբերդում ձերբակալվել է, բանտարկվել և աքսորվել Մելիտինե:

Սպանվել է 1915 թ., Խոզաթում/Մելիտինեում, ի թիվս բազմաթիվ հայ մտավորականների՝ 40 տարեկանում:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 233–234: