Մուսուլմանական Իրանի ու քրիստոնյա Հայաստանի միջև հարաբերությունները առանձնահատուկ դրական են. դեսպան

Այսօր տեղի ունեցավ ՀՀ-ում Իրանի դեսպան  Մոհամմադ Ռեյիսիի մամուլի ասուլիսը, որի ընթացքում խոսվեց Իրանի նկատմամբ պատժամիջոցների վերացման  և հայ-իրանական հարաբերությունների ընթացքի մասին:

Դեսպանը խոսեց Իրանի նկատմամբ ԱՄՆ-ի կիրառած պատժամիջոցների արդյունքում Իրանի ժողովրդի և Իրանի տնտեսության կրած վնասների մասին:

Նա նշեց նաև, որ Իրանի և Հայաստանի միջև հարաբերությունները միայն խոսքի մակարդակում չեն: «Ողջ աշխարհում չեք կարող տեսնել այնպիսի լավ հարաբերություններ, որոնք գոյություն ունեն մուսուլմանական Իրանի ու քրիստոնյա Հայաստանի միջև: Իրանի ժողովուրդը մեծ սիրով է ընդունում Հայաստանի ժողովրդին, նույնպես էլ Հայաստանի ժողովուրդը օտար չի ընդունում իրանցիներին: Մեր երկու պետությունների միջև ազգակցական պատմամշակութային կապերը դարերի խորքից են գալիս»,- ասաց դեսպանը:

Նա նշեց, որ այն դաժան պատժամիջոցները որ կիրառվեցին Իրանի դեմ, կարելի է ասել, եզակի էին, նմանը չկար աշխարհում: 40 տարի Իրանը գտնվել է էմբարգոների ներքո, և երբ  Իրանի հեղափոխությունը հաղթանակեց, դեսպանի խոսքով, որոշ երկրներ փոխանակ օգնեին Իրանին, որը նոր էր այդ հեղափոխությունը արել, ընդհակառակը` խիստ սահմանափակումներ սկսեցին Իրանի դեմ, բացասական քարոզչություն սկսեցին, որն այն աստիճանի էր հասել, որ ԱՄՆ-ում սեպտեմբերի 11-ի ահաբեկչության ժամանակ փորձում էին դրա ետևում տեսնել Իրանին, այնինչ` այդ գործողությունների ետևում Սաուդյան Արաբիայի քաղաքացիներ են եղել:

Դեսպանը հավելեց, որ Իսրայելը 20 մլն դոլար էր ներդրել, որ ԱՄՆ-ը դեմ լինի այդ միջուկային համաձայնագրին, որ Իսրայելը 35 տարի է` սուտ ու կեղծիք է տարածել աշխարհում` Իրանին ներկայացնելով որպես վտանգավոր երկիր:

«Բայց աշխարհն այսօր հասկացավ,  որ հենց Իսրայելն է վտանգ ներկայացնում աշխարհի համար: Նրանց նպատակն էր ծնկի բերել Իրանի ժողովրդին ու տապալել վարչակարգը: Իրանը միլիարդավոր վնասներ է կրել այս տարիների ընթացքում, բայց Իրանի ժողովրդի հետ երբեք հնարավոր չէ ուժի լեզվով խոսել: Իրանի ժողովուրդն իր 35 տարվա դիմադրությամբ ողջ աշխարհին ապացուցեց, որ բանակցությունների,  խելքի ու տրամաբանության կողմնակից է»,- ասաց Ռեյիսին` հավելելով, որ մոտ 10 տարի է անհրաժեշտ, որ Իրանի տնտեսությունն ուշքի գա պատժամիջոցներից: