Ավստրալահայերը 50.000 դոլար կնվիրաբերեն սիրիահայերին` որպես օգնություն

Ավստրալիայում սիրիահայերին օգնելու նպատակով կազմակերպված հանգանակության շնորհիվ հավաքվել է 50.000 ավստրալական դոլար:

Դրամահավաքը կազմակերպվել է հունիսի 22-ին: Առաջին շաբաթվա ընթացքում հավաքվել է 26 000 ավստրալական դոլար, իսկ եզրափակիչ համերգի ժամանակ գումարը հասել է 40 000-ի. տեղեկացնում է Asbarez-ը՝ վկայակոչելով Yerkouyn-ը:

Կայքը նշում է, որ համերգին ներկա է եղել ընդամենը 120 հայ հանդիսատես: 10 000 դոլարը հայ գործարարների նվիրատվությունն է:

Հավաքված գումարն ամբողջությամբ նվիրաբերվելու է սիրիահայության օժանդակության աշխատանքներին և հատկապես` հալեպահայությանը, որն այսօր դիմագրավում է կենցաղային և անվտանգության լուրջ խնդիրների:

Դրամահավաքը կազմակերպվել է Ավստրալիայի ՀՅԴ «Դրո» կոմիտեի, Հայ օգնության միության, Հայ մարմնակրթական ընդհանուր միության, Հայ Դատի Ավստրալիայի հանձնախմբի և Ավստրալիայի ՀՅԴ երիտասարդական միության կողմից: