Զինվորական մեքենայի վթարի հետևանքով մահացած Արտյոմը Սառնակունքից էր՝ ընտանիքի ավագը

Արդեն հայտնել ենք, որ երեկ Սպիտակ-Երեւան ավտոճանապարհին զինծառայողներին տեղափոխող «Ուրալ» մակնիշի ավտոմեքենան դուրս է եկել երթեւեկելի հատվածից եւ շրջվել հարակից ձորակը: Ավտոմեքենայի թափքում գտնվող զինծառայողները տարբեր աստիճանի մարմնական վնասվածքներով տեղափոխվել են Սպիտակ քաղաքի հիվանդանոց: Ցավոք, վթարի արդյունքում մահացել է զինծառայող, զինվորական մեքենայի վարորդ Արտյոմ Թովմասյանը:

Yerkir.am-ի տեղեկություններով՝ Արտյոմը Սյունիքի մարզի Սառնակունք գյուղից էր, զորակոչվել էր 2013-ի դեկտեմբերին:

Սառնակունքի գյուղապետ Մանուչար Մկրտչյանը  yerkir.am-ին հայտնեց, որ Արտյոմն ընտանիքի ավագ որդին էր, իրենից փոքր երկու դպրոցական եղբայր ուներ:

«Նորմալ, սովորական ապրող ընտանիք է, գյուղատնտեսությամբ են զբաղվում»,- ասաց նա և հավելեց, որ Արտյոմը բանակ է գնացել դպրոցն ավարտելուց հետո:

Նշենք, որ վիրավոր զինծառայողները,  Սպիտակի հիվանդանոցում ստանալով առաջին բուժօգնությունը, տեղափոխվել են Կենտրոնական կլինիկական զինվորական հոսպիտալ: Դեպքի մանրամասները ճշտվում են:

Լուսանկարը՝ lorinews.am-ի