Զինվորական մեքենայի վթարի փաստով նյութեր են նախապատրաստվում

ՀՀ ՊՆ-ն երեկ զինվորական ավտոմեքենայի վթարի վերաբերյալ հանդես է եկել հայտարարությամբ, որի տեքստը ներկայացնում ենք ստորև.

 «Ս.թ. ապրիլի 8-ին` ժամը 10:25-ի սահմաններում N զորամասի անձնակազմը զորավարժության վայր տեղափոխող «Սադկո» մակնիշի ՊԲ զինհամարանիշի ավտոմեքենան Ֆիզուլիի տարածքի «Ղարբա-Բազար» տեղամասում ճանապարհի փոսը շրջանցելիս, շրջվել է ձախ կողքի վրա, որի հետևանքով խցիկում գտնվող 2  և մեքենայի թափքում գտնվող 19 զինծառայողներ տարբեր աստիճանի մարմնական վնասվածքներով տեղափոխվել են զինվորական հոսպիտալ, որտեղ 5 զինծառայողներ բուժզննումից հետո ախտորոշվել են պրակտիկ առողջ: Մյուս զինծառայողների առողջական վիճակը բավարար  է:
Փաստի առթիվ ՀՀ ՊՆ քննչական ծառայությունում նախապատրաստվում են նյութեր»:

Դեպքի վերաբերյալ ավելի վաղ տեղեկություն էր տվել Yerkir.am-ը, որի հետ զրույցում ԼՂՀ պաշտպանության նախարարի մամուլի քարտուղար Սենոր Հասրաթյանն ասել էր, որ լուրջ բան չկա, և զինվորները ընդամենը ստացել են թեթեւ քերծվածքներ: