Աշխարհի համար դա ահաբեկչության մոտիվացիա է. Գալուստ Սահակյանը՝ Սեֆիլյանի քայլերի մասին

Այսօր լրագրողները ԱԺ նախագահ Գալուստ Սահակյանին հարցրել են, թե արդյո՞ք պատիվ է բերում Հայաստանին այն հանգամանքը, որ ապրիլի 24-ի նախօրեին քաղբանտարկյալներ կան: Գալուստ Սահակյանը պատասխանեց. «Եթե վտանգավոր պրոցեսներ կան… Եվ ես չեմ կարծում, որ ազգային ինչ-որ խնդիրների թատերաբեմում քաղաքական տվայտանքների առումով հեռանկարներ պիտի հյուսվեն: Դա չեմ համարի դավաճանություն: Համենայն դեպս, դա ճիշտ չէ: Դուք պատկերացնո՞ւմ եք, եթե այդ ոչ տրամաբանական հոտը քաղաքական դաշտ չմտներ, ոչ թե կունենայինք երեք-չորս նախագահների այցեր, այլ 15 նախագահների այցեր»:

ԱԺ նախագահը ուշադրություն հրավիրեց Հիմնադիր խորհրդարանի նախորդ հայտարարությունների վրա, որոնցում խոսվում է այն մասին, որ, եթե մարդիկ գաղթում են, պետությունը վերանում է, ի՞նչ է պատահել`մի քիչ էլ զոհեր ունենանք:

«Այս հայտարարությանը տեղյակ չե՞ք: Իհարկե, ես գիտեմ, որ դա այն թիմը չէ: Իհարկե, դուք էլ չեք ճանաչում այդ թիմին եւ ոչ էլ Ժիրայրին եք ճանաչում, որ կկարողանար էդպիսի բաներ անել, համենայն դեպս, աշխարհի համար դա ահաբեկչության մոտիվացիա է: Այսինքն` ուզում էին ապրիլի 24-ին մեր Եղեռնի հուշարձանի մոտ զոհվեի՞ն, մատա՞ղ դառնային: Այսինքն` ուշ ժամի եթե ցնցումներ ենք անում… մենք ոչինչ չենք տեսնում, ոչ այն համակարգը կա, ոչ էլ այն ուժը կա, բայց երբ ամբողջ աշխարհը նայում է Հայաստանին, եւ Ցեղասպանության միջոցառումներ պիտի լինեն, դու իտալացուն չես կարող բացատրել, որ Ժիրայր Սեֆիլյանն այդքան չէ, որ կարողանա: Մարդը ինչպիսի գործողություն էլ որ անում է ու տուժողի դերում է հանդես գալիս, բոլորը ոգեւորված կանգնում են տուժողի կողքին: Դա էլ, կարծում եմ, մեր պատմության հետեւանքն է: Ժիրայր Սեֆիլյանն իր ողջ թիմով այն չափը, որն ունի`հրաշք է, այդ չափից ավելը ծիծաղելի է»,- եզրափակեց ԱԺ նախագահը: