Հակոբ Հակոբյանը երիկամի ստենտավորման կարիք ունի

Բժշկական հետազոտությամբ պարզվել է, որ ԱԺ նախկին պատգամավոր Հակոբ Հակոբյանն անհապաղ վիրահատության, մասնավորապես` երիկամի ստենտավորման կարիք ունի: Այս մասին yerkir.am-ին հայտնեց նրա պաշտպան Կարեն Սարդարյանը` հավելելով, որ իր պաշտպանյալի վիճակն այն աստիճանի է վատթարացել, որ ի վիճակի չի եղել անգամ տեսակցության ներկայանալ:

Հակոբյանի պաշտպանը դիմել է ՀՀ ԱՆ քրեակատարողական վարչությանը` իր պաշտպանյալին հրատապ քաղաքացիական հիվանդանոց տեղափոխելու խնդրանքով: Նախկին պատգամավորը, բացի երիկամային խնդրից, այալ առողջական խնդիրներ ևս ունի, նա այժմ գտնվում է «Դատապարտյալների հիվանդանոց» ՔԿՀ-ում` բժիշկների հսկողության տակ:

Հիշեցնենք, որ Հակոբ Հակոբյանը մեղադրվում է ՀՀ քրեական օրենսգրքի 188-րդ հոդվածի 3-րդ մասի 1-ին կետով, 188-րդ հոդվածի 2-րդ մասով, 38-205-րդ հոդվածի 1-ին մասով, 38-188-րդ հոդվածի 3-րդ մասի 1-ն կետով, 188-րդ հոդվածի 3-րդ մասի 1-ին կետով, 38-205-րդ հոդվածի 1-ին մասով, 38-205-րդ հոդվածի 2-րդ մասով նախատեսված` հանրորեն վտանգավոր արարքներ կատարելու կասկածանքով: Վերոնշյալ հոդվածները վերաբերում են ապօրինի ձեռնարկատիրությամբ զբաղվելուն, ապօրինի ձեռնարկատիրությանն օժանդակելուն, ինչպեսև հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակելուն: