Սրտի ստենտավորման գինը Հայաստանում որոշակիորեն կիջնի

Հունվարի 1-ից հանրապետության հինգ խոշոր բժշկական կենտրոններում ներդրվել է «Անվճար մեկ ստենտ՝ կյանքի համար» ծրագիրը՝ միտված սուր ինֆարկտով հիվանդների կյանքի փրկությանը: Ծրագրի շրջանակներում տեղադրվում է անվճար մեկ` ոչ դեղապատ ստենտ:

ՀՀ առողջապահության նախարարի տեղակալ Սերգեյ Խաչատրյանն այսօր  լրագրողներին հայտնեց, որ ծրագրի շրջանակներում մինչ օրս 801 ստենտավորում է կատարվել: Դիմելիությունը, բնականաբար, ավելի է եղել:

«Շատերը բողոքում են, որ Հայաստանում ստենտավորումն ավելի թանկ է, քան հարևան երկրներում: Մենք տեղի 11 կենտրոնների հետ ենք խոսել և տնտեսագիտական հաշվարկներով ցույց տվել, որ իրականում ծառայության գինն իջեցնելու հնարավորություն կա, և բարձր գինը պայմանավորված է նաև հիվանդների քիչ թվով: Գյումրիի հիվանդանոցը, օրինակ, արդեն իսկ իջեցրել է ստենտավորման գները` 1 800 000-ից դարձնելով 1 200 000, բայց սա էլ դեռ վերջնական գինը չէ: Այնպես որ` առաջիկայում կարող ենք սպասել, որ ստենտավորման գինը Հայաստանում որոշակիորեն կիջնի»,- ասաց Խաչատրյանը: