Հայկազ Բարսեղյանի սպանության մեջ մեղադրվող Նորիկ Սահակյանն իրեն մեղավոր չի ճանաչում

Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվող նրա համակուրսեցիներից Նորիկ Սահակյանն իրեն մեղավոր չի ճանաչում: Այս մասին yerkir.am-ին հայտնեց Նորիկի պաշտպան Հովիկ Արսենյանը:

Նա նշեց, որ իր պաշտպանյալը ցուցմունք է տվել և հայտնել, որ ո\'չ տուժողի, ո\'չ էլ մյուսների հետ բացարձակապես որևէ առնչություն չի ունեցել: Ի դեպ, Հովիկ Արսենյանը չի բողոքարկել Սահակյանի նկատմամբ որպես խափանման միջոց ընտրված` կալանավորման որոշումը: «Կատարվել է այնպիսի զազրելի հանցագործություն, որ ըմբռնումով ենք մոտեցել և ժամանակ տրամադրել քննչական մարմնին: Եթե որևէ կասկած կամ փաստեր կան Նորիկ Սահակյանի նկատմամբ, խնդրե’մ, թող քննությունը կատարեն` կպարզեն իրական ճշմարտությունը»,- ասաց փաստաբանը: Նրա խոսքով` նախաքննական մարմինն այժմ փորձ է անում իր պաշտպանյալի ներկայացրած ալիբին ժխտել:

Նշենք, որ Նորիկ Սահակյանն Արթիկից է:

Հիշեցնենք, որ ձեռք բերված ապացույցների համակցությամբ՝ համածառայակիցներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Նրանց նկատմամբ խափանման միջոց է ընտրվել կալանավորումը։ Նախաքննությունը շարունակվում է։