Հայկազ Բարսեղյանի սպանությունը մեծ ստվեր գցեց ռազմական ինստիտուտի ղեկավարության վրա. նախարար

2015 թվականը զինված ուժերի համար լարված տարի էր. այսօր Վազգեն Սարգսյանի անվան ռազմական ինստիտուտում լրագրողների հետ հանդիպման ժամանակ ասաց ՀՀ պաշտպանության նախարար Սեյրան Օհանյանը:

Նա հայտնեց, որ արդեն մշակել են 2016-2020 թվականների` զինված ուժերի զարգացման ծրագիրը, իսկ 2016-ը ՊՆ-ն հայտարարել է հրամանատարական պատրաստության տարի՝ նպատակ ունենալով բարձրացնել զինված ուժերի հրամանատարական կազմի արհեստավարժությունը և ունենալ ավելի պատրաստված հրամանատարներ:

Լրագրողներից մեկի դիտարկմանը, թե ի՞նչն է պատճառը, որ այսօր սահմանին կանգնած են և զոհվում են հիմնականում սոցիալապես ծանր պայմաններում ապրող ընտանիքներից զինվորներ, և ի՞նչ է անում նախարարությունը զոհվածների ընտանիքներին աջակցելու ուղղությամբ, նախարարը պատասխանեց. «Վերջին տարիներին բավական լուրջ ծրագրեր ենք իրականացնում զորակոչի անցկացման ուղղությամբ՝ հավաքակայանում ընդունումից մինչև վիճակահանություն: Մենք զորամասերում բաշխում իրականացնելիս չենք նայում, թե ինչ ընտանիքից է, բաշխում իրականացնում ենք ըստ տվյալ զորակոչիկի կրթական ցենզի, ֆիզիկական հատկանիշների: Ցավոք, վերջին տարիներին ինչպես է ստացվում, որ այդ հանգամանքը կա: Սահմանին կանգնած զինվորների գործած սխրանքների արդյունքում է, որ մենք կարողանում ենք խաղաղություն ապահովել: Վերջին տարիների ընթացքում մենք ունեցել ենք զոհեր` և\' հրամանատարներ, և\' զինվորներ բոլոր տարածաշրջաններից: Չկա որևէ ընտանիք, որ ոչ միայն բանակի ուշադրության, այլև հասարակության, հատկապես` ՏԻՄ-երի, կառավարության և ԱԺ-ի ուշադրության կենտրոնում չլինի»:

Անդրադառնալով կուրսանտ Հայկազ Բարսեղյանի սպանությանն ու դրան հաջորդած պաշտոնանկություններին, նախարարն ասաց. «Հայկազ Բարսեղյանի սպանությունը մեծ ստվեր գցեց ռազմական ինստիտուտի պատմության և ինստիտուտի ղեկավարության վրա: Ռազմական ինստիտուտն իր առջև դրված խնդիրները կատարում է: Մենք ունենք հրամանատարների մի ամբողջ համաստեղություն, որոնք առանձնանում են իրենց գրագիտությամբ և արհեստավարժությամբ: Ցավոք, այսպիսի կառույցներում էլ են լինում բացթողումներ: Այժմ էլ ինստիտուտում կադրային փոփոխությունները շարունակվում են: Հայկազ Բարսեղյանի գործն իրավական հարթակում է, մենք իրավապահների հետ հետևելու ենք, որ մեղավորները պատժվեն»: