Թեկուզ սիմվոլիկ ներկայությունը կլինի Հայաստանի կողմից արված ժեստ. Մահչուպյանը՝ Սերժ Սարգսյանին ուղղված հրավերի մասին

Թուրքիայի վարչապետ Ահմեդ Դավութօղլուի հայ խորհրդական Էթիեն Մահչուպյանը հայտնել է, որ Հայաստանի պետությունն ու ժողովուրդը Թուրքիայի հետ փոխհարաբերություններին ավելի պատրաստ են, քան Հայկական սփյուռքը:

AA-ի թղթակցի հետ զրույցում Մահչուպյանը հայտնել է Թուրքիա-Հայաստան հարաբերությունների «ապաքինման շրջանի» հնարավորության մասին:

«Հայաստանն ու Հայաստանի հասարակությունը Թուրքիայի հետ հարաբերություններ հաստատելու հարցում ավելի պատրաստ են, քան Հայկական Սփյուռքը: Սակայն այլ կերպ է երևում, քանի որ Հայաստանի պետությունը բիրտ ձևով է խոսում: Եթե շրջեք Հայաստանի փողոցներով և զրուցեք հասարակության հետ, այդպիսի խնդիր չկա: Այսինքն` այն, ինչ կտեսնեք Թուրքիայի փողոցներում, կտեսնեք նաև այնտեղ: Մարդիկ ցանկանում են մտերմանալ»,- ասել է նա:

Նշելով, որ երկու պետությունների միջեւ կա կարոտ, Մահչուպյանն ասել է. «Այս մարդիկ նույն մշակույթի հետնորդներն են, լսում են նույն երաժշտությունը: Այսինքն` կա այնպիսի կարոտ, երբ երկու կողմերն էլ պատրաստ են շփման: Բայց, դե, ապրում են ազգային աշխարհում, կան սահմաններ և պետություններ: Դրանք ամեն ինչ դարձնում են պաշտոնական, որի արդյունքում էլ առաջ են գալիս անհավասարությունը եւ պայմաններ դնելու ու նմանատիպ թեմաներ, ինչը հարաբերությունների սառեցման պատճառ է դառնում»:

Նա անդրադարձել է նաև Թուրքիայի նախագահ Ռեջեփ Թայիփ Էրդողանի՝ ՀՀ նախագահ Սերժ Սարգսյանին՝ ապրիլի 24-ին Չանաքքալեի 100-ամյակի միջոցառումներին հրավիրելուն:

«Սա ամբողջ աշխարհին ուղղված հրավեր է: Հայաստանն էլ դուրս չմնաց այս հրավերներից: Եթե նայենք այդ ճակատամարտի ընթացքում զոհվածներին, նրանց թվում հայեր կան: Եթե Հայաստանը անցյալի հայերի հետ ունի որևէ հոգևոր կապ, նշանակում է այդ խնդիրն ունի նրանց վերաբերող կողմ: Հետևաբար, թեկուզ սիմվոլիկ ներկայությունը, կարծում եմ, կլինի Հայաստանի կողմից արված ժեստ: Սակայն պետությունները կարող են չվարվել բարոյական պարտավորությունների համաձայն, այլ՝ ըստ շահերի և շահարկումների: Ինչպես, օրինակ, Սարգսյանն ասել էր. «Մենք էլ ձեզ հրավիրեցինք, դուք էլ այդ հրավերն ընդունեիք»,- ասել է Մահչուպյանը: