Դա կազդի Արևելյան գործընկերության հետ համագործակցության վրա. Բաքուն մնացել է առանց հրավերի

Ադրբեջանի ԱԳՆ-ն արձագանքել է ադրբեջանական Haqqin.az կայքում տեղ գտած այն տեղեկատվությանը, որ ԵՄ-ն Ադրբեջանին չի հրավիրել Արևելյան գործընկերության քաղաքացիական հասարակության ֆորումի ամենամյա` 10-րդ վեհաժողովին:

Բրյուսելում դիվանագիտական աղբյուրները Haqqin.az-ին հայտնել  են, որ ԵՄ-ն հրավեր չի ուղարկել Ադրբեջանի կառավարությանը, փոխարենը որոշում է կայացվել, որ միջոցառմանը կմասնակցի Վրաստանում Ադրբեջանի դեսպանատան ներկայացուցիչը, այն էլ` դիտորդի կարգավիճակով:

Դիվանագետները  կարծիք են հայտնել, որ տեղի ունեցածը, հավանաբար, կապված է ամփոփիչ հռչակագրի հետ, որը կներկայացվի վեհաժողովի մասնակիցների դատին: Դրանում աջակցություն կլինի Վրաստանի ու Ուկրաինայի տարածքային ամբողջականությանը և կբացակայի եվրոպական հասարակության վերաբերմունքը Ադրբեջանի «տարածքային ամբողջականության» և ԼՂ հակամարտության հետևանքների նկատմամբ:

ԱԳՆ-ի պաշտոնական ներկայացուցիչ Լեյլա Աբդուլաևան ասել է, որ եթե տեղեկությունը հաստատվի, «դա իհարկե, կազդի Ադրբեջանի` Արևելյան գործընկերության հետ համագործակցության վրա»:

Նշենք, որ,  ըստ նույն կայքի, հատուկ հյուրի կարգավիճակով վեհաժողովին կմասնակցի ՀՀ վարչապետը: