Դոլար մի’ մանրեք, Ռուսաստանից լավ բան մի’ սպասեք, եվրոպացիներից արդարադատություն մի’ ակնկալեք

 Yerkir.am-ի զրուցակիցն է ՀՀ փաստաբանների պալատի անդամ, փորձագիտական կենտրոնի հարավկովկասյան ներկայացուցչության ղեկավար Նիկոլայ Բաղդասարյանը:

-Պարո’ն Բաղդասարյան, ինչո՞վ էր առանձնահատուկ 2014 թվականը Ձեզ համար` աշխատանքում, ընտանիքում:

- Երկար ժամանակ երազել եմ ստեղծել անկախ դատական փորձագիտական կենտրոն, որի նորությունը լինելու է այն, որ փորձաքննությունները կատարվելու են եվրոպական երկրներում աշխատող լավագույն փորձագետների հետ համատեղ, օգտագործվելու են Հայաստանում դեռևս չգործող, սակայն եվրոպական երկրներում մեծ զարգացում ստացած առաջադեմ տեխնոլոգիաներ: Այս տարի նման կենտրոնի հիմնումը Հայաստանում մեզ հաջողվեց, իսկ հաջորդ տարի նման կենտրոններ գործելու են և՛ Վրաստանում, և՛ Ռուսաստանում:

-Անցած տարի իրավական ոլորտում արված ամենամեծ բարեփոխումը, որի դրական հետևանքներն ուղղակի զգալի էին:

 - Բարեփոխում չէ, բայց իմ և ողջ փաստաբանական համայնքի համար մեծ ձեռքբերում էր այն, որ երկար տարիների աշխատանքի արդյունքում ՀՀ փաստաբանական պալատը վերջապես ունեցավ իր շենքը` մի կառույց, որի մասին երկար տարիներ երազում էին փաստաբանները:

- Տարվա ամենազավեշտալի դատական գործը:

- Մի տարեց կնոջից երկու շատ հանրաճանաչ անձինք, առանց որևէ հատուցում տալու, խաբեությամբ խլել էին բնակելի տունն ու հողամասը և դիմել դատարան՝ այդ կնոջն իր իսկ տնից վտարելու պահանջով: Կինը դիմել էր ոստիկանություն, որպեսզի քրեական գործ հարուցեն այդ անձանց նկատմամբ, սակայն ոստիկանները մերժել էին: Կինը բողոքել էր դատախազին, և անսպասելիորեն դատախազը, ընդառաջելով նրան, հանձնարարել էր հարուցել քրեական գործ: Կինն ուրախացել էր արդար որոշման համար, բայց դատարանը քաղաքացիական գործը կասեցնելու փոխարեն որոշել էր այդ կնոջը վտարել իր տնից, ինչի հետևանքով կինը հայտնվեց փողոցում: Չգիտեմ` ինչը կարող է ավելի զավեշտալի, բայց և միաժամանակ տխուր լինել:

-Տարվա «ամենավտանգավոր հանցագործը»:

 - Անտարբերությունը:

-Տարվա ամենաաղմկալի դատական գործը:

 -Վարդան Պետրոսյանի գործը:

- Տարվա ամենաանհեթեթ դատավճիռը:

- Շանթ Հարությունյանի գործով դատավոր Մարտիրոսյանի կայացրած դատավճիռը:

- Տարվա «հայտնություն» իրավաբանը:

- Ջորջ Քլունիի կինը՝ փաստաբան Ամալ Ռամզի Քլունին:

-Ամենամեծ հիասթափությունը:

- Հիասթափվել եմ մի քանի մարդուց, երբ հասկացել եմ, որ ամեն ինչ արել են իրենց անձնական շահի համար, սակայն ներկայացրել, թե դա արվել է հանուն ընկերության և բարեկամության:

- Ամենամեծ սուտը, որ լսեցիք դատարանում:

-Շատ դժվար է գնահատել ստի մեծությունը, սակայն ինձ համար ամենամեծ սուտն այն էր, որ գործերից մեկով դատավորը հայտնեց, որ «ինքն» է որոշել մերժել դատաավտոտեխնիկական փորձաքննություն նշանակելու` իմ միջնորդությունը:

- Ո՞ր դատավորին կցանկանայիք տեսնել Ձմեռ պապի կերպարում (եթե կին է` Ձյունանուշիկի):

- Ձմեռ պապը և Ձյունանուշիկը բարի կերպարներ են, իսկ մեր դատավորները չարացած են, հետևաբար` դժվար է գոնե մեկին այդ կերպարում պատկերացնել:

-Սովորաբար շատ են զավեշտալի դեպքեր պատահում դատական նիստերի ընթացքում: Այս տարի պատահածներից ո՞րն էր ամենացնցողը:

- Այն, երբ Արգիշտի Կիվիրյանի գործով վկան կերավ իր հեռախոսի քարտը:

-Վայ, կերավ, ժողովո’ւրդ, իրականում կերավ, - զարմացավ փաստաբան Լուսինե Սահակյանը:

 -Խնդրում եմ արձանագրել այն փաստը, որ վկան կերավ իր հեռախոսի քարտը, - ասաց փաստաբան Երվանդ Վարոսյանը:

 -Անուշ եղավ, - ինչ-որ մեկն ասաց դահլիճում:

-2015-ից Ձեր ակնկալիքներն ու մաղթանքը:

- Դոլար մի’ մանրեք, Ռուսաստանից լավ բան մի’ սպասեք, եվրոպացիներից արդարադատություն մի’ ակնկալեք, բացի ձեզանից, ուրիշի վրա հույս մի’ դրեք: Մի խոսքով` լավ եղեք: Իսկ եթե լուրջ, ապա թող այս տարին լինի արդարության ու հաղթանակի, բարության և հաջողության տարի: Շնորհավոր Նոր տարի..