Մենք մի բան ենք պայմանավորվում, վերջում այլ բան է գրվո՞ւմ, այ քեզ բան. վարչապետը զայրացավ

Այսօր կառավարության նիստում, երբ էկոնոմիկայի նախարար Կարեն Ճշմարիտյանը ներկայացնում էր «Մայքրոսոֆթ» ընկերության և կառավարության միջև ստորագրվելիք համաձայնագիրը, նա խնդրեց երկու օր ժամանակ տալ` մի շարք հարցեր պաշտպանության նախարարության և կառավարության աշխատակազմի հետ միասին հստակեցնելու համար:

Հովիկ Աբրահամյանը հարցրեց նախարարին. «Բայց այստեղ մեր պայմանավորված գումարից ավելի է գրված»:

Նախարարը պարզաբանեց, որ պայմանավորված գումարը ներկայացված է հավելվածներում, և ճշգրտումների համար են խնդրում երկու օր:

Հովիկ Աբրահամյանը կրկին հարցրեց, որ պայմանավորվել են երեք տարի` ամեն տարի մեկ միլիոն դոլարին համարժեք դրամ ներկայացնել, բայց փաստաթղթում գրված է 602 միլիոն: Կարեն Ճշմարիտյանը նշեց, որ ճշգրտված հաշվարկներն այդքան են ցույց տալիս:

«Ի՞նչ է նշանակում ճշգրտված հաշվարկներ, մենք մի բան ենք պայմանավորվում, վերջում այլ բան է գրվո՞ւմ: Այ քեզ բան»,- զայրացավ վարչապետը:

«Կճշգրտենք, պարո'ն վարչապետ»,- ասաց նախարարը:

«Ո'չ, պայմանավորվածությունը չպետք է խախտվի»,- շեշտեց վարչապետը: