Կարծում եմ` ճիշտ բան ենք անում, լավ բան ենք անում. Կարեն Կարապետյանը՝ գյուղական դպրոցների մասին

Կառավարության նիստում, նախքան օրակարգին անցնելը, Կարեն Կարապետյանը մի հանձնարարական տվեց ԿԳ նախարարին, որը վերաբերում էր գյուղական դպրոցների զարգացմանը: Մասնավորապես՝ հանձնարարվեց գյուղական դպրոցների զարգացման հայեցակարգի շրջանակում ապահովել շաբաթական առնվազն մեկ դպրոցի հետ հեռահաղորդակցային կապ՝ մշակելով տվյալ դպրոցի հետ ուսումնակրթական ծրագրի կիրառման մեխանիզմներ:

Վարչապետը հավելեց, որ կառավարության ծրագրում հստակ ձևակերպված է, որ բոլոր դպրոցական համայնքները պետք է հնարավորություն ունենան զարգանալու, որտեղ ուսուցիչների պակաս կա, որտեղ համապատասխան մակարդակի պակաս կա, տալ հնարավորություն երեխաներին իրականացնելու այդ դասընթացները: «Կարծում եմ, ճիշտ բան ենք անում, լավ բան ենք անում և հետևողական ենք լինելու»,- ասաց վարչապետը: