Իրանահպատակ ադրբեջանցու սպանության համար ցմահ ազատազրկված ազատամարտիկի գործով դատարանը բողոքը մերժեց

Իրանահպատակ ադրբեջանցու սպանության համար ցմահ ազատազրկման դատապարտված ազատամարտիկ Սողոմոն Քոչարյանի գործը վերաքննելու վերաբերյալ դատախազության մերժման որոշումը Ս. Քոչարյանի փաստաբան Ռոբերտ Ռևազյանը բողոքարկել էր հետո Կենտրոն և Նորք-Մարաշ վարչական շրջանների ընդհանուր իրավասության դատարանում:

Այսօրվա դատական նիստում փաստաբանը ներկայացրեց բողոքը` նշելով, որ կա գործով նոր երևան եկած հանգամանք, և այդ հիմքով պետք է գործը վերաքննության ուղարկվի: Նոր հանգամանքն այն է, որ տարիներ անց Քոչարյանի գործով մեղադրանքը պաշտպանած դատախազ Ժիրայր Խառատյանն իր հարցազրույցներից մեկում հայտնել է, թե այս գործով քաղաքական ճնշման պատճառով է ցմահ ազատազրկման դատապարտվել անձը:

Սակայն այս գործով դատախազը պնդեց, որ նոր երևան եկած հանգամանք դա չի կարող համարվել, քանի որ Ժիրայր Խառատյանը չի հայտնել, թե Քոչարյանը տվյալ հանցագործությունը չի կատարել կամ կատարել է ավելի մեղմ կամ ծանր հանցագործություն:

Կողմերի դիրքորոշումները լսելուց հետո դատարանը, դատավոր Արմեն Բեկթաշյանի նախագահությամբ, անցավ խորհրդակցական սենյակ և մոտ 20 րոպե անց հրապարակեց որոշումը` մերժել Ռոբերտ Ռևազյանի կողմից բերված բողոքը:

Yerkir.am-ի այն հարցին, թե արդյո՞ք դատարանի այս որոշումը սպասելի էր, Ռ. Ռևազյանը պատասխանեց` այո, սակայն որոշումը բողոքարկելու են վերադասության կարգով:

«Պարզապես նման գործերը փորձաքար են մեր իրավական համակարգի համար, թե որքանով են արժեւորում մարդուն: Եթե մարդը լիներ արժեք, ապա մենք նույնիսկ չէինք հասցնի բողոք ներկայացնել դատարան, դատախազությունն ինքը հետամուտ կլիներ այդ գործին»,- ասաց փաստաբանը:

Մանրամասները` տեսանյութում: