ՅՈՒՆԵՍԿՕ-ում թեժ է եղել. ադրբեջանական կողմին դուր չի եկել, որ հիշատակել ենք Արցախի, Ջուղայի և Նախիջևանի մասին

ՅՈՒՆԵՍԿՕ-ի «Ոչ նյութական մշակութային ժառանգության պաշտպանության մասին» կոնվենցիայի միջկառավարական կոմիտեի 9-րդ նիստում որոշում է կայացվել ՅՈՒՆԵՍԿՕ-ի` մարդկության ոչ նյութական մշակութային ժառանգության ներկայացուցչական ցանկում ներառել Հայաստանի կողմից ներկայացված «Լավաշ. ավանդական հացի պատրաստումը, նշանակությունը և մշակութային դրսևորումները Հայաստանում» հայտը:

Լրագրողների հետ հանդիպման ժամանակ Հայաստանի ՅՈՒՆԵՍԿՕ-ի ազգային հանձնաժողովի գլխավոր քարտուղար Վահրամ Կաժոյանը նշեց, որ միջկառավարական կոմիտեի քննարկումների արդյունքում ընդունվել է 27 զեկույց, այդ թվում` մեր` խաչքարերի և դուդուկի մասին զեկույցը: Ըստ Կաժոյանի` զեկույցում որոշ բաներ դուր չեն եկել Ադրբեջանին, նրանք բողոքի ալիք են բարձրացրել:

«Դուդուկի մասին զեկույցում, օրինակ, նշել էինք, որ դուդուկի համերգներ տեղի են ունեցել մի շարք պետություններում, այդ թվում` նաև Արցախում: Իսկ ահա խաչքարերի հետ կապված ներկայացնում էինք Ջուղայի խաչքարերի ոչնչացման դեպքերը` Նախիջևանի մասին նույնպես հիշատակելով: Ադրբեջանին, բնականաբար, դուր չեկավ, որ մենք հիշատակել են Արցախը, Ջուղան և Նախիջևանը»,-ասաց Կաժոյանը:

Ըստ նրա` ադրբեջանական պատվիրակությունը բողոքել էր, որ մեր զեկույցից պետք է հանենք այդ «բառերը», սակայն մեր փաստարկներն այնքան համոզիչ են եղել, որ զեկույցն ընդունվել է այնպես, ինչպես ներկայացվել է: