ԱՄՆ պետդեպարտամենտը սպառնացել է Սաուդյան Արաբիային` Խաշուկջիի գործի հետ կապված

ԱՄՆ պետդեպարտամենտը հայտարարել է,  որ նոր քայլեր կդիտարկի Սաուդյան Արաբիայի նկատմամբ` սաուդցի ընդդիմադիր լրագրող Ջամալ Խաշուկջիի սպանության հետ կապված. հայտնում է РИА Новости-ն:

Գերատեսչությունը նաև ասել է, որ կուսումնասիրեն լրագրողի գործով ՄԱԿ-ի` երեկ հրապարակված զեկույցը, և նոր փաստերի ի հայտ գալու դեպքում Էր Ռիադի դեմ քայլերը կընդլայնվեն:

Ավելի վաղ ՄԱԿ-ի արտադատական մահապատիժների հարցերով հատուկ զեկուցող Անիես Կալամարը կոչ է արել Սաուդյան Արաբիային` ներողություն խնդրել Թուրքիայից, ԱՄՆ-ից և սաուդցի ընդդիմադիր լրագրող Ջամալ Խաշուկջիի ընտանիքից ու ընդունել  նրա սպանության մեղքը: 

Նա նաև ասել է, որ հավաստի ապացույցներ կան, որ Խաշուկջիի սպանությանը մասնակից է Սաուդյան Արաբիայի  թագաժառանգ արքայազնը, սակայն անհրաժեշտ է հետագա հետաքննության անցկացում: Զեկույցում կոչ է արվում պատժամիջոցներ սահմանել արքայազնի նկատմամբ:

Հիշեցնենք, որ Washington Post –ի մեկնաբան Խաշուկջին առանձնակի դաժանությամբ սպանվել էր Թուրքիայում անցյալ տարվա հոկտեմբերին: Հիմնական կասկածյալն է սաուդյան թագաժառանգ արքայազնը, որի հետ լրագրողը տարաձայնություններ է ունեցել: