Սպիտակ տանը ցուցադրվել է Հայոց ցեղասպանությունը խորհրդանշող գորգը. թուրքական կայքի անդրադարձը

Արդեն հայտնել ենք, որ Հայոց ցեղասպանությունը խորհրդանշող «Որբերի գորգը» կցուցադրվի Սպիտակ տանը: Երեկ՝ նոյեմբերի 18-ին, գորգը հանվեց ցուցադրության:

Թուրքական Haberler կայքն անդրադարձել է դրան` նշելով, որ Հայոց ցեղասպանությունը խորհրդանշող գորգը կցուցադրվի մինչև նոյեմբերի 23-ը:

Կայքը հայտնել է, որ գորգի ցուցադրման կապակցությամբ ասուլիս է կազմակերպվել, որին ներկա են եղել կոնգրեսականներ Ադամ Շիֆը, Դեյվիդ Վալադաուն, Ժուդի Չուն, Ջիմ Քոսթան և այլք: Կայքի պնդմամբ՝ հանդիպման ժամանակ ընդգծել են, որ գորգի ցուցադրումը հայ ժողովրդի համար «պատմական օր է», և ԱՄՆ կոնգրեսը 1915 թվականի իրադարձությունները պետք է որպես ցեղասպանություն որակի:

Թուրքական կայքը նշել է, որ Հայոց ցեղասպանության 100-ամյա տարելիցին ընդառաջ, երբ հայկական լոբբին այդ ուղղությամբ մեծ աշխատանքներ է տանում, «Որբերի գորգի» ցուցադրումը մեծ ուշադրություն է հրավիրել այդ թեմային: