Ինքը, կաբինետում նստած, հո չէ՞ր գնա չենջ` փող մանրեր. ցուցմունք տվեց Ներսիկ Նազարյանի օգնականը

Կենտրոն և Նորք-Մարաշ վարչական շրջանների ընդհանուր իրավասության դատարանում քննվող`  ֆինանսական բուրգի գործով այսօրվա դատական նիստում վկայություն տվեց Երևանի նախկին ոստիկանապետ Ներսիկ Նազարյանի օգնականը` Սարգիս Սարգսյանը:

Նա նախկինում աշխատել է ոստիկանության Երևան քաղաքի վարչության տնտեսական բաժանմունքում` որպես ավագ տեսուչ, և փաստացի եղել է Նազարյանի օգնականը: Վկան դատարանում հայտնեց, որ նախաքննության ընթացքում քննիչն իրեն հարցրել է` արդյոք խոշոր գումար տվե՞լ է գործով մեղադրյալ Արթուր Անդրեասյանին, ինքը պատասխանել է` ոչ:

Նա դատարանում հաստատեց, որ երբևէ գումար չի տվել Արթուրին, և հայտնեց, որ ինքն ընդամենը կատարել է Ներսիկ Նազարյանի հանձնարարականները` ամբաստանյալ Արթուր Անդրեասյանի մոտ (Կասյան փողոցում գտնվող տարադրամի փոխանակման կետում) պարբերաբար գումարներ է փոխել, մանրել:

«Դե, ինքը (նկատի ունի Ներսիկ Նազարյանին.- խմբ.), կաբինետում նստած, հո չէ՞ր գնա չենջ` փող մանրեր»,- ասաց վկան:

Նշենք, որ, համաձայն տուժող Արտակ Գալստյանի ցուցմունքի, 2013թ. մարտին ամբաստանյալն իրեն հայտնել էր, որ բարձր տոկոսներով գումարներ է վերցրել Շիրակի ոստիկանապետ Կարեն Բաբակեխյանից, Երևան քաղաքի վարչության պետ Ներսիկ Նազարյանի աներորդի Կարեն Մանուկյանից, Ներսիկ Նազարյանի օգնականից և այդ պատճառով հայտնվել նյութական ծանր վիճակի մեջ,  և որ գումար չունի` իրեն վերադարձնելու համար:

Ի դեպ, այսօրվա նիստին դատարանը բերման էր ենթարկել երկու վկայի, ովքեր թեև մշտապես պատշաճ ծանուցվել էին, սակայն չէին ներկայացել դատարան:

Հիշեցնենք, որ այս գործով վկայի կարգավիճակում են նաև Ներսիկ Նազարյանը, նրա որդին՝ Արմեն Նազարյանը, Կարեն Բաբակեխյանը, նրա որդին՝ Ռուբեն Բաբակեխյանը: Դեռևս հայտնի չէ` հիշյալ անձինք կներկայանա՞ն դատարան, թե՞ ոչ: