Ըստ ԲՀԿ-ական պատգամավորի` իշխանությունների հետ բանակցելու համար ժողովրդի թիվը կարեւոր չէ

ԱԺ ԲՀԿ խմբակցության պատգամավոր Միքայել Մելքումյանն այսօր լրագրողների հետ զրույցում, պատասխանելով հարցին` ի՞նչ է լինելու վաղը Ազատության հրապարակում հրավիրվող հանրահավաքում, արդյո՞ք եռյակը պահանջելու է Սերժ Սարգսյանի հրաժարականը, պատասխանեց. «Բոլոր գաղտնիքները չենք բացահայտելու, այդ դեպքում կլինի ոչ թե հարցրազրույց, այլ «Բացահայտում» հաղորդաշար»:

Դիտարկմանը, որ պետք է բացահայտել և թափանցիկ աշխատել ժողովրդի հետ, պատգամավորը պատասխանեց. «Թափանցիկ ենք աշխատում: Այ, վաղը հանրահավաքը կլինի… Այ, օրինակ, զարգացումները ձեզ ի՞նչ են թելադրում, դուք չեք տեսնո՞ւմ որևէ զարգացում»:

Հարցին` արդյո՞ք եռյակը կբանակցի իշխանությունների հետ, եթե հանրահավաքի եկած ժողովրդի զանգվածը հասնի կրիտիկական թվի, Միքայել Մելքումյանը պատասխանեց` պարտադիր չէ` կրիտիկական զանգված լինի, որ բանակցես, հետո` բանակցել` նայած ինչի շուրջ:

Նրա խոսքով` բանակցությունները թելադրվելու են` կոնկրետ իրավիճակից ելնելով, դա կյանքը ցույց կտա, և կարևոր չէ` մեկ ամիս հետո կլինի, թե` տարի հետո: Պատգամավորի համոզմամբ` իշխանափոխությունը ասելով չ է միայն, երբ քաղաքական գործընթացներն ուժեղանան ու քաշ հավաքեն, այն ժամանակ էլ կլինի իշխանափոխություն:

Լրագրողները հարցրեցին նաև` արդյո՞ք այս հանրահավաքն էլ է լինելու նախորդի պես սովորական, պատգամավորը տարակուսեց. «Ի՞նչ է նշանակում սովորական, նախորդը սովորական է՞ր, նայած թե ով ինչ սպասելիքներ ուներ: Հանրահավաքը չի կարող սովորական լինել, հանրահավաքը երևույթ է: Այ, երբ վաղը կլինի հանրահավաքը, կլսեք Ծառուկյանի ելույթն ու գործողությունների ծրագիրը, այդ ժամանակ ամեն ինչ կիմանաք: Հիմա չեմ կարող առաջ անցնել ու ասել, թե Գագիկ Ծառուկյանն ինչ է ասելու»:

ԲՀԿ-ական պատգամավորը հավելեց, որ իր անձնական նախընտրությունն այն է, որ ամեն կերպ պետք է բացառել որևէ արյունահեղություն ու մայդան, և իշխանափոխությունը պետք է արժանապատիվ ձևով տեղի ունենա:

Հարցին, թե ինչպես է վերաբերվում Հովիկ Աբրահամյանի այն հայտարարությանը, թե նախագահին ոչ ոք չի կարող փոխել, պատգամավորը պատասխանեց. «Բայց ի՞նչ էիք կարծում, որ վարչապետը կանգնի, ասի, որ կարելի է նախագահին փոխե՞լ»: