Աննկարագրելի զգացողություններ ապրեցի օլիմպիական խաղերի ժամանակ. Նարեկ Մանասյան

Պատանեկան օլիմպիական խաղերում Հայաստանի օլիմպիական հավաքականի կազմում փայլեց նաև բռնցքամարտիկ 81 կգ քաշային Նարեկ Մանասյանը, ով նվաճեց բրոնզե մեդալ:

Երիտասարդ, հեռանկարային և խոստումնալից բռնցքամարտիկի համար  տարին կարելի է բրոնզե համարել: Մեր մարզիկը բրոնզե մեդալ էր նվաճել նաև երիտասարդների աշխարհի առաջնությունում: Բռնցքամարտի Հայաստանի ֆեդերացիայի մամուլի բաժինը հարցազրույց է ունեցել Նարեկ Մանասյանի հետ:

 -Նարեկ, դու տարբեր մակարդակի մրցաշարերի ես մասնակցել, այդ թվում Եվրոպայի և աշխարհի առաջնությունների, բայց վստահ եմ Օլիմպիական խաղերը քո կյանքի ամենակարևոր մրցաշարն էր:

-Այդպես էլ կա: Աննկարագրելի զգացողություններ ապրեցի օլիմպիական խաղերի ժամանակ, որը մինչ այս ոչ մի մրցաշարի ժամանակ չէի ապրել: Ուրախ եմ , որ մասնակցեցի օլիմպիական խաղերին: Կարծում եմ դա յուրաքանչյուր մարզիկի երազանքն է:

 -Ինչպիսի՞ն էր Օլիմպիական ավանը, ինչ էր կազմակերպվում, որպեսզի մարզիկների առօրյան հագեցած անցնի:

 -Չինացիներն ամեն ինչ արել էին մասնակիցների առօրյան հետաքրքիր դարձնելու համար: Ամենուր ուրախ ու տոնական տրամադրություն էր: Ինձ հատկապես դուր եկավ բացման և փակման արարողությունը: Մրցումներից ազատ օրերին մենք մասնակցում էինք տարբեր միջոցառումների, նույնիսկ մեր ձեռքով հուշանվերներ էինք պատրաստում:

 -Նարեկ, դու վստահ հաղթանակ տոնեցիր քո առաջին մենամարտում: Ի՞նչը խանգարեց, որպեսզի զարգացնես հաջողությունդ:

 -Երկրորդ մրցելույթիս ժամանակ՝ Ղազախստանը ներկայացնող մարզիկի հետ պայքարում ես առավելություն ունեի, իմ հարվածներն ավելի նպատակային էին, բայց մրցավարները չգիտես ինչու չէին տեսնում իմ հարվածները: 3-րդ ռաունդում ես վնասվածք ստացա, մրցակցի հարվածը դիպավ աչքիս, բայց անգամ այդ պարագայում ես առավելություն ունեի, չնայած մրցավարները հաղթանակը տվեցին ղազախ մարզիկին:

 -Այնուհանդերձ հաջորդ մենամարտում վնասվածքով կարողացար հաղթել և բրոնզե մեդալ նվաճել:

 -Մրցակիցս անգլիացի Վիդալ Ռայլինն էր, ում հաղթել էի նաև աշխարհի առաջնության ժամանակ: Երկուսս էլ տեղյակ էինք միմյանց հնարավորություններից: Պետք է նշեմ, որ հեշտ մենամարտ չստացվեց : Վնասվածքս զգացնել էր տալիս , hատկապես, երբ հարված էի բաց թողնում, բայց այնուհանդերձ կարողացա հաղթել:

 -Առջևում Զագրեբում կայանալիք Եվրոպայի առաջնություն է: Ժամանակը չէ՞ մեդալի հարգը փոխելու:

 -Այո, ամեն ինչ անելու եմ որպեսզի լավ պատրաստվեմ և ավելի բարձր հարգի մեդալով վերադառնամ Հայաստան