Վերերկրային զգացողություններ. Ռոմեո եւ Ջուլիետ

Ալ. Սպենդիարյանի անվան օպերայի եւ բալետի ազգային ակադեմիական թատրոնում տեղի ունենցավ Սերգեյ Պրոկոֆևի «Ռոմեո եւ Ջուլիետ» բալետային ներկայացման պրեմիերան, որը բեմադրել էր Ռուդոլֆ Խառատյանը:

Ակադեմիական թատրոնի սիմֆոնիկ նվագախմբի մեկնաբանությամբ հնչող երաժշտությունը` դիրիժոր` ՀՀ վաստակավոր արտիստ Կարեն Դուրգարյանի ղեկավարմամբ, պատմում եւ տեսանելի էր դարձնում շեքսպիրյան պատմության յուրաքանչյուր դրվագ, յուրաքանչյուր տող:

Համաձայն մտահղացման` դեկորները և բեմական հագուստները պետք է հիշեցնեն 16-րդ դարի Վերոնան, միեւնույն ժամանակ, պետք է փոխանցեն ժամանակակից զգացում: Հիրավի, այնքան ճիշտ էր ընտրված բեմից երեւացող յուրաքանչյուր իր, յուրաքանչյուր դետալ, որ մերթ 16-րդ , մերթ 21-րդ դար էր հանդիսատեսը տեղափոխվում` չզգալով հինգդարյա անցումը:

Ռոմեո եւ Ջուլիետի հավերժական սիրո պատմությունը ներկայացնում են ազգային թատրոնի մենապարողներ` Ռուբեն Մուրադյանը, Սեւակ Ավետիսյանը, Ժակլին Սարխոշյանը, Սյուզի Փիրումյանը, Նարեկ Մարտիրոսյանը, Կարեն Խաչատրյանը, Արման Բալմանուկյանը, Սերգեյ Սաֆարյանը:

«Օ, ֆանտաստիկ են զգացողությունները, ուղղակի` վերերկրային: Հիանալի է մշակված յուրաքանչյուր տեսարանը եւ հատկապես` երաժշտությունը: Եթե չեմ սխալվում, Հայաստանում շատ վաղուց եւս մեկ անգամ «Ռոմեո եւ Ջուլիետ» եմ տեսել. կարծեմ` 70-ականներին»,- ասաց Հրաչյա Տեմիրճիպաշյանը, որը բնակվում է Սիրիայում, բայց տարվա մեջ 2 անգամ պարտադիր գալիս է Հայաստան:

Պարոն Տեմիրճիպաշյանը չէր սխալվում. առաջին անգամ Հայաստանում «Ռոմեո եւ Ջուլիետ»-ը բեմադրվել է 1970թ.` Օլեգ Վինոգրադովի խորեոգրաֆիայով, որտեղ Ռոմեոյի դերում հանդես է եկել Ռուդոլֆ Խառատյանը: