Սեյրան Օհանյանը` Ադրբեջանի նախապատրաստական աշխատանքների մասին

Այսօր կառավարության նիստից առաջ ՀՀ պաշտպանության նախարար Սեյրան Օհանյանը զեկուցեց սահմանային լարվածության վերաբերյալ:

Նա նախ նշեց, որ բացի դիվերսիոն-հետախուզական և հարձակողական բնույթի գործողություներից, վերջին օրերին  հակառակորդի կողմից իրականացվել են նաև այլ գործողություններ. հայտարարվել է ողջ անձնակազմի հավաք, բերվել են ծառայության ուժեղացված ռեժիմի, մտցվել են զորանոցային վիճակներ, արձանագրվել են անձնակազմի զինտեխնիկայի տեղաշարժեր գրեթե բոլոր զորամիավորումների պահպանության գոտիների դիմաց:

Իրականացվում է ավիացիայի՝ ինքնաթիռների և ուղղաթիռների ակտիվություն առաջնային գծի երկայնքով, որոշ ստորաբաժանումներ՝ խոցման և նաև երկրորդ շարակազմի, բերվել են մարտական պատրաստականության բարձր աստիճանի, հրամանատարական կետերի բացազատում, առաջնագծում ակտիվացել են հակառակորդի անօդաչու թռչող սարքերի թռիչքները, տեղեկատվական և քարոզչական միջոցառումների շրջանակներում Ադրբեջանի ռազմաքաղաքական ղեկավարությունը շարունակում է ապատեղեկատվության տարածումը:

«Ինչպես գիտեք, ադրբեջանական մի քանի ԶԼՄ-ներում նրանք ներկայացնում են այնպես, որ հաղթանակն իրենք են տարել, և հայկական կողմը մեծ կորուստներ է տվել: Կորուստների հարաբերակցությունը, եթե այսօր համեմատենք, 1/8 և 9, այսինքն՝ 8-9 անգամ նրանք ավելի շատ կորուստներ են ստացել: Որոշ սահմանամերձ բնակավայրերում, շրջաններում իրավիճակի սրումը Ադրբեջանի Հանրապետության գյուղի բնակիչների մոտ առաջացրել է խուճապ և արտահոսք: Այդ կապակցությամբ սահմանամերձ նորակառույց բնակավայրերում ուժեղացվել է վարչական և ոստիկանական ռեժիմը»,- ասաց Սեյրան Օհանյանը:

Նրա խոսքով` հայկական ԶՈւ-ն որոշակի քայլեր է  իրականացնում զորահավաքային պլանների ճշգրտման, զգուշացման ուղղությամբ: Սեյրան Օհանյանը 1994 թվականից հետո աննախադեպ է համարում հակառակորդի կողմից նման գործողությունները:

Ըստ Սեյրան Օհանյանի, գործողությունների վերլուծությունը ցույց է տալիս, որ ադրբեջանական կողմը չի սահմանափակվում զուտ հրադադարի խախտումներով և իրականացնում է ավելի լայնամասշտաբ գործողությունների նախապատրաստական աշխատանք:

Այդ ամենը, նախախարի խոսքով,  հետևանք է ադրբեջանական կողմի հռետորաբանության և նպատակ ունի բանակցային գործընթացի վրա ազդելու և նաև ներքին լսարանի համախմբման և պարտվածի թերարժեքության վերացման և զինված ուժերի ոգու բարձրացման: