Եթե շրջափակված խմբավորումը զինաթափվի` արմատական բեկում կլինի պատերազմում. Օլեգ Ցարյով

Լուգանսկում աշխատանքն է սկսել Ժողովրդական հանրապետությունների միության Գերագույն խորհրդի երկրորդ նստաշրջանը. հայտնում է ИТАР-ТАСС-ը: Նախագահում է ԺՀՄ ԳԽ նախագահ Օլեգ Ցարյովը: Գրանցվել է 48 պատգամավոր` Լուգանսկից` 25, Դոնեցկից` 23:

Ելույթ ունենալով նստաշրջանի բացման ժամանակ` Ցարյովը ներկայացրել է պատգամավորներին տարածաշրջանում ստեղծված իրավիճակը, ԺՀՄ-ի վարած ռազմական գործողությունները:

«Կարծում եմ, որ այս շաբաթվա ընթացքում հասկանալի կլինի` կմնա՞նք ներկայիս դիրքերում եւ կպաշտպանենք մեր քաղաքները, թե՞ առաջ կշարժվենք»,- ասել է նա:

Ըստ Ցարյովի` Կիեւի զինվորականների շարքերում, որոնք հասկանում են իրադրությունը, խուճապային տրամադրություններ կան: «4 հազար ուկրաինացի զինծառայողներ գտնվում են շրջափակման մեջ, մթերքի մատակարարում չկա: Եթե այդ շրջափակված խմբավորումը զինաթափվի, արմատական բեկում կլինի պատերազմում: Ներկա պահին իրադարձությունները զարգանում են այնպես, ինչպես կցանկանայինք, որ զարգանային»,- ասել է նա: