Հրաձգության աշխարհի գավաթի խաղարկություն. հայ մարզիկների ելույթները

Հրաձգության աշխարհի գավաթի խաղարկությանը, որը մեկնարկել է հունիսի 4-ին Գերմանիայի Մյունխեն քաղաքում, մասնակցում է նաև Հայաստանի հավաքական թիմի 4 մարզիկ` Զավեն Իգիթյանը,  Քրիստիան  Լաուերը,  Հրաչիկ Բաբայանը և  Մարիամ Միքայելյանը՝  գլխավոր մարզիչ Սեյրան Նիկողոսյանի և մարզիչ Անդրանիկ Այվազյանի ղեկավարությամբ:

Ինչպես տեղեկացնում է սպորտի և երիտասարդության նախարարության պաշտոնական կայքը, երեկ՝ հունիսի 9-ին, ազատ ոճի ատրճանակ մրցաձևի ամենակրտսեր մասնակից` 15-ամյա Զավեն Իգիթյանը (անձնական մարզիչ` Խորեն Իգիթյան) մասնակցել է 50 մ վարժության (60 կրակոց) կիսաեզրափակիչին՝ 70 մրցակիցների շարքում գրավելով 53-րդ տեղը և գրանցելով 546 միավոր արդյունք:

Մեր մյուս մասնակիցներից  Քրիստիան  Լաուերը` 50 մ, փոքր տրամաչափի հրացան, պառկած դիրքից (60 կրակոց) վարժության նախընտրական փուլում 70 մրցակցից գրավել է 48-րդ տեղը՝գրանցելով 615,4 միավոր,  իսկ  Հրաչիկ Բաբայանը՝  66-րդ տեղը (605,3 միավոր) և դուրս են մնացել հետագա մրցապայքարից: Նրանց անձնական մարզիչն է Անդրանիկ Այվազյանը:

Առաջնության ընթացքում, որը կավարտվի հունիսի 13-ին, 96 երկրի 1292 հրաձիգներ միմյանց հետ մրցում են գնդակային և ստենդային հրաձգության օլիմպիական մի շարք վարժություններում:

Նշենք, որ մեր մարզիկները մրցելույթներով հանդես կգան նաև հունիսի 11-ին և 12-ին: