Թախտիի գավաթի խաղարկություն. հայ ըմբիշների արդյունքները

Իրանի Քերմանշահ քաղաքում անցկացվում է ըմբշամարտի ամենահեղինակավոր մրցաշարերից մեկը՝ Թախտիի գավաթի 35-րդ խաղարկությունը, որին այս անգամ մասնակցում են 16 երկրի ուժեղագույն ըմբիշներ: 

Ստուգատեսի ձևաչափն այս անգամ փոխվել է, ու իրանցի ազատ ոճի լեգենդար ըմբիշ, օլիմպիական խաղերի և աշխարհի չեմպիոն Գոլամրեզե Թախտիի մրցանակները խաղարկում են ոչ միայն ազատ ոճի, այլ նաև հունահռոմեական ոճի ըմբիշները:

Ավանդական այս ստուգատեսին մասնակցում են մեր ազատ ոճի 12 ըմբիշներ` մարզիչներ Հաբեթնակ Կուրղինյանի ու Սուրեն Մարկոսյանի ղեկավարությամբ: 

Ինչպես տեղեկացնում Հայաստանի ըմբշամարտի ֆեդերացիայի պաշտոնական կայքը, երեկ` մրցաշարի 1-ին օրը, ազատ ոճի ըմբիշները պարգևներ խաղարկվեցին 57, 61, 97 և 125 կգ քաշային կարգերում: 

Նշենք, ազատ ոճի ըմբշամարտի մրցաշարում առաջին օրվա մրցանակների առյուծի բաժնին տիրացան տանտերերը: 4 քաշային կարգերում խաղարկված 16 պարգևներից իրանցիները նվաճեցին 3 ոսկե, 4 արծաթե  և 5 բրոնզե մրցանակ, ընդհանուր առմամբ` 12 մեդալ՝ պարգևների 75 տոկոսը:

Ազատ ոճի մրցաշարում 1-ին օրը հաղթողներ դարձան՝
57 կգ՝ Յունես Սարմաստի, Իրան, 
61 կգ՝ Բեհնամ Էհսանպուր, Իրան,
97 կգ՝ Էլիզբար Օդիկաձե, Վրաստան, 
125կգ՝ Փարվիզ Հադի, Իրան: 

Առաջին օրվա մրցապայքարին մասնակցեց հայազգի 3 ըմբիշ՝ 2-ը Հայաստանից, մեկը՝ Ուկրաինայից: Առավել հաջող էր Ուկրաինայի չեմպիոն` 57 կգ քաշային Նիկոլայ Այվազյանի ելույթը: Նա 1/8-րդ փուլում 7:0 հաշվով հաղթեց թունիսցի Չեդլի Մեթլութային, բայց  քառորդ եզրափակիչում համառ պայքարում 5:6 հաշվով զիջեց ապագա բրոնզե մեդալակիր իրանցի Ռեզա Արտիին: Ի դեպ, վերջինս 1/8-րդ փուլում 7:2 հաշվով առավելության էր հասել ու հետագա մրցպայքարից դուրս էր մղել Հայաստանի հավաքականի պատվիրակ Գոռ Գրիգորյանին: 

97 կգ քաշային կարգում ելույթ ունեցած Անդրանիկ Գալստյանը նույնպես անհաջողության մատնվեց իր առաջին իսկ գոտեմարտում՝ 1/8-րդ փուլում զիջելով եգիպտացի Ալ Համիդ Ամինին:

TAKHTI CUP-2015-ի  2-րդ օրը ազատ ոճի ըմբշամարտի մրցաշարում պարգևներ կխաղարկվեն 65, 70, 74 և 86 կգ քաշային կարգերում: Հայաստանի պատվիրակներից նախատեսվում է, որ այսօր մրցագորգ դուրս կգան Արթուր Բաղդասարյանը և Նարեկ Սիրունյանը (երկուսն էլ 65 կգ), Իշխան Պողոսյանը և Վալտեր Մարգարյանը (երկուսն էլ 70 կգ), Վարուժան Կաջոյանը և Գևորգ Համբարձումյանը (երկուսն էլ 74 կգ), Վահե Թամրազյանը, Արման Մկրտչյանը և Շամիր Աթյանը (երեքն էլ 84 կգ):