Արտաքին պարտքի սպասարկման մասին` գլխավոր գանձապետի պատասխանը նման էր Պարույր Սևակի բանաստեղծությանը

Այսօր ԱԺ մշտական հանձնաժողովների համատեղ նիստում, երբ ներկայացվում էին 2013թ. բյուջեի կատարման հաշվետվությունները, Հայաստանի արտաքին պարտքի սպասարկման վերաբերյալ հիմնական զեկուցող ԿԲ նախագահ Արթուր Ջավադյանին հարց ուղղեց ԱԺ պատգամավոր Նիկոլ Փաշինյանը:

Նա նշեց, որ 2013թ. աննախադեպ տարի էր արտաքին պարտքի սպասարկման առումով, որը կազմել է 861 միլիոն դոլար կամ բյուջեի եկամտային մասին շուրջ 33 տոկոսը: Համեմատելով նախորդ տարվա արտաքին պարտքի սպասրկման ցուցանիշի հետ` պատգամավորը նշեց, որ այս տարի երկու անգամ ավելի շատ է եղել` 2012-ին այդ ցուցանիշը կազմել է 239 միլիոն դոլար:

«2020-ին արտաքին պարտքի սպասարկման ցուցանիշը հասնելու է մեկ միլիարդ դոլարի: Որքանո՞վ են նպատակահարմար այդպիսի պիկերը, ի՞նչ կտա դա տնտեսությանը, ինչպե՞ս կազդեն տնտեսության վրա այդ կտրուկ վերելքները, ինչո՞ւ հնարավոր չէ սահուն դարձնել արտաքին պարտքի սպասարկման աճը»,- հարցեց Փաշինյանը:

ԿԲ նախագահ Արթուր Ջավադյանը նշեց, որ արտաքին պարտքի սպասարկման կտրուկ աճը պայմանավորված է եղել ռուսական 500 միլիոն դոլար վարկը ժամկետից շուտ մարելու` քաղաքական որոշումով:

«Ճիշտ եք ասում` արտաքին պարտքի սպասարկման պիկ ենք ունենալու 2020-ին, Ձեր անհանգստությունը հասկանալի է, թե արդյո՞ք ունակ ենք լինելու սպասարկել արտաքին պարտքը: Ես` որպես ԿԲ նախագահ, ասում եմ, որ` այո, ունակ ենք լինելու սպասարկել, քանի որ ունենք լուրջ գործիքներ»,- ասաց Արթուր Ջավադյանը` հավելելով, որ 2013 թվականն ավարտել են արտաքին ռեզերվների` պատմականորեն ամենաբարձր մակարդակով:

ՀՀ գլխավոր գանձապետ Ատոմ Ջանջուղազյանն էլ խիստ մասնագիտական պատասխան տվեց` ասելով, որ հարցի ճիշտ հասցեատերը կառավարությունն է, Հայաստանը վաղաժամկետ մարել է ռուսական վարկը, որը, ի դեպ, լողացող տոկոսադրույքով է եղել, ինչը ունի իր ռիսկերը: «Մեկ միլիարդ դոլարը, իհարկե, տպավորիչ է հնչում, բայց դա վերաբերում է 2020-ին, մենք դրան հանգիստ ենք նայում»,- ասաց նա:

Նիկոլ Փաշինյանն, արձագանքելով, նշեց, որ գլխավոր գանձապետի ելույթը ավելի շատ Պարույր Սևակի բանաստեղծություններից մեկին էր նման, և այդ համատեսքտում ԿԲ նախագահի պատասխանը, քիչ, թե շատ, ավելի հասկանալի էր, որով պարզ է դառնում, որ կայացվել է քաղաքական որոշում, և արտաքին պարտքի սպասարկումը հետ է մղվել դեպի 2020թ:

«Ինձանից հետո թեկուզ ջրհեղեղ, դրան է նման այդ քաղաքական որոշումը` որքան հնարավոր է պարտքը հեռացնել իրենցից: Սա աննախադեպ պիկ է, որն ավելի շատ հարցեր է առաջադրում, քան այս երկարատև պատասխաններն էին»,- ասաց Նիկոլ Փաշինյանը:

Արթուր Ջավադյանն էլ նշեց, որ մտադիր չեն պարտքն իրենցից հետ մղել, և անկախ այդ ռուսական վարկից, միևնույն է, 2020-ին, արտաքին պարտքի սպասարկումն ավելի շատ է լինելու:

«Մի պարտքը վերցնում եք, որ մյուսի պարտքը տաք»,- տեղից արձագանքեց Փաշինյանը: