Բախշյանը դեմ է քվեարկել Միկոյանի արձանի տեղադրմանը Հայկ Դեմոյանի հայտարարությունից հետո

Երեկ Երևան քաղաքի ավագանին որոշում է ընդունել քաղաքում տեղադրել ԽՍՀՄ գործիչ Անաստաս Միկոյանի հուշարձանը: Որոշման նախագծին դեմ են քվեարկել «Բարև Երևան» խմբակցության անդամներն ու ՀՀԿ խմբակցության անդամ, Ցեղասպանության թանգարանի տնօրեն Հայկ Դեմոյանը:

Yerkir.am-ի հետ զրույցում «Բարև Երևան» խմբակցության անդամ Անահիտ Բախշյանը նշեց, որ Միկոյանի արձանի տեղադրմանը դեմ է քվեարկել, ընդհանուր առմամբ, չորս հոգի:

Թե ինչո՞ւ է «Բարև Երևանը» դեմ քվեարկել, Ա. Բախշյանը պատասխանեց. «Երբ այդ նախագիծը ներկայացվեց, ՀՀԿ խմբակցությունից Դեմոյանը բարձրաձայնեց այն մասին, որ ունեն փաստաթուղթ, համաձայն որի` 1937-ին Հայաստանից մարդկանց ցուցակ է եղել, որոնց առաջարկվում էր գնդակահարել: Միկոյանն այդ ցանկն ավելացրել է: Դրա համար էլ մենք էդպես քվեարկեցինք»:

Իսկ թե արդյո՞ք «Բարև Երևանը» դեմ չէր լինի, եթե Դեմոյանը նման բան չհայտարարեր, Ա. Բախշյանը պատասխանեց. «Կարևորը ինֆորմացիան էր, որ մենք իմացանք, մենք չգիտեինք դրա մասին: Եվ դրանից հետո ո՞նց կողմ կքվեարկես այդպիսի մարդու հիշատակին կառուցվելիք հուշարձանին»: