Չհերքեցին. ստորագրահավաք օպերայի թատրոնում` գեղարվեստական ղեկավարի համար

Վաղը տեղի է ունենալու օպերայի եւ բալետի ակադեմիական թատրոնի տնօրենի թափուր պաշտոնի համար հայտարարված մրցույթի վերջնական փուլը` գրավոր քննություն և հարցազրույց:

Արդեն մի քանի տարի է, ինչ Ալ. Սպենդիարյանի անվան օպերայի և բալետի ազգային ակադեմիական թատրոնը չունի գեղարվեստական ղեկավար: Լուրեր էին պտտվում, թե թատրոնում ստորագրահավաք է` նախկին գեղարվեստական ղեկավարին` Գեղամ Գրիգորյանին, կրկին նույն պաշտոնին նշանակելու համար:

Yerkir.am-ի հետ զրույցում թատրոնի փոխտնօրեն Սուրեն Աղաբաբյանը նշեց, որ ինքը տեղյակ չէ, բայց լսել է նման բան, և դա ավելի շուտ ոչ թե պահանջատիրական ստորագրահավաք է, այլ կոլեկտիվի ցանկությունն է:

«Արդեն գիտեք, որ գեղարվեստական ղեկավարի դրույքը հանվել էր վաղուց: Կոլեկտիվի մտածմունքն է, որ լինի գեղարվեստական ղեկավար, ով կկազմակերպի թատրոնի ստեղծագործական քաղաքականությունը: Նշանակման, միջնորդման մասին խոսակցություն չկա, ուղղակի ցանկություն է: Քանի որ Գեղամ Գրիգորյանը մեր թատրոնում աշխատել է, քաջատեղյակ է ամեն ինչից, մեծ փորձ ունի, դրա համար էլ կոլեկտիվը նրան է ցանկանում տեսնել այդ պաշտոնում»,- ասաց Աղաբաբյանը: