Այս պահին Երևանում sett-weather
Փոխարժեքներ 22 11 2024
USD ⚊ $ 389.45
EUR ⚊ € 409.74
RUB ⚊ ₽ 3.86
GBP ⚊ £ 491.95
GEL ⚊ ₾ 142.08
կարևոր
0 դիտում, 5 տարի առաջ - 2018-12-03 14:53
Մշակույթ

Համազգային թատրոնում իրավիճակը թեժանում է. նորանշանակ գեղարվեստական ղեկավարի առաջարկը

Համազգային թատրոնում իրավիճակը թեժանում է. նորանշանակ գեղարվեստական ղեկավարի առաջարկը
Համազգային թատրոնի նորանշանակ ռեժիսոր Սուրեն Շահվերդյանը ֆեյսբուքյան իր էջում գրում է. «Համազգային թատրոնի ստեղծագործական կոլեկտիվ, քայլ անենք` միասին: 
 
Իբրև նորանշանակ գեղարվեստական ղեկավար՝ լավատեսությամբ համակված և նաև ստեղծված իրավիճակից ելնելով, արժևորելով Ձեր մասնագիտական որակները և թատրոնի հանդեպ ձեր նվիրվածությունն ու սերը, աշխատելու և արարելու Ձեր ցանկությունը՝
ԱՌԱՋԱՐԿՈՒՄ ԵՄ՝
1. Առաջարկ ՆԱՐԻՆԵ ԳՐԻԳՈՐՅԱՆԻՆ. 
Բարձր գնահատելով Նարինե Գրիգորյանի և՛ դերասանական, և՛ ռեժիսորական կարողությունները՝ հրաժարվում եմ, իբրև ռեժիսոր, առաջինը ներկայանալ Համազգայինի բեմում սեփական նախագծով և առաջարկում եմ Նարինե Գրիգորյանին բեմադրել ցանկացած պիես՝ ցանկացած ստեղծագործական կազմով: Իմ կողմից պարտավորվում եմ ստեղծել աշխատանքային բարենպաստ միջավայր, ապահովել ֆինանսական հոսքեր, և անշուշտ, նպաստել ներկայացման հանրահռչակման գործընթացին: 
 
2. Առաջարկ ՀԱՄԱԶԳԱՅԻՆ ԹԱՏՐՈՆԻ ԱՐՏԻՍՏՆԵՐԻՆ.
Լսելով ձեր մտահոգությունները մասնավորաբար ճեմասրահում Սոս Սարգսյանի նկարի, ձեր լուսանկարների, պատերին ազդագրերի առատության, կուլիսների խնդրի, դռների փականների և այլ խնդիրների շուրջը՝ առաջարկում եմ համատեղ քննարկել բոլոր խնդիրները և խոստանում անմիջապես դրական լուծում տալ:
Այսուհետ առաջարկում եմ առավել դեմոկրատ և թափանցիկ կառավարում:
Քայլ անենք միասին և ապացուցենք, որ բոլորս ենք մտահոգ թատրոնի ներկայով և ապագայով»:
 
Ուշագրավ է այն հանգամանքը, որ Նարինե Գրիգորյանին նման «հնարավորություն» է ժամանակին տվել նաև Վիգեն Չալդրանյանը: Ի դեպ, ամենայն հարգանքով Շահվերդյանի հանդեպ, պետք է նշել, որ ոլորտին մի փոքր ծանոթ մարդն անգամ գիտի` Նարինե Գրիգորյանի առջև բաց են բոլոր թատրոնների դռները, և Գրիգորյանը կարող է հանդես գալ  ցանկացած թատրոնում, ինչը և արել է` ինչպես տիկնիկային, այնպես էլ մնջախաղի թատրոններում: 
 
Թատրոնում կրքերը հանդարտվելու փոխարեն կարծես ավելի են թեժանում: Դերասանական կազմից Yerkir.am-ին հայտնեցին, որ շարունակում են դեկտեմբերի 1-ից մեկնարկած գործադուլը` պահանջելով թատրոնի տնօրեն Վիգեն Չալդրանյանի հրաժարականը: 
 
Հիշեցնենք, որ Չալդրանյանը մեզ հետ զրույցում նշել էր, որ ինքն արդեն իսկ քայլ արել է` մասնակիորեն բավարարելով դերասանական կազմի ցանկությունը` հրաժարվել է գեղարվեստական ղեկավարի պաշտոնից: Սակայն, նրա խոսքով, ինքն էլ ունի անուն, արժանապատվություն և իր համար վիրավորական է  այս իրավիճակը: «Ինձ ասացին` բա չե՞ս վախենում, որ մենք շատ ենք ու կարող ենք քո անունն արատավորել: Այո, վիրավորական է, որ դու ծառայել ես քո երկրին, նվիրվել արվեստին, չես գնացել երկրից, շատ բաներ զոհաբերել ես` վասն քո առաքելության և թատրոնի: Չեմ կարծում, որ այսօր ես արժանի էի նման վերաբերմունքի»,- ասաց Չալդրանյանը:
 
ՀՀ մշակույթի փոխնախարար Նազենի Ղարիբյանն էլ ասել էր` ևս մեկ անգամ կզրուցի կողմերի հետ, և եթե համաձայնության չգան, թատրոնը կգնա լուծարման: 
բաժանորդագրվել
Նմանատիպ նյութեր

Լրահոս

  • բոլոր լուրերը

    • Հետադարձ կապ

    • Սոց. ցանցեր

    © 2024 Yerkir.am Բոլոր իրավունքները պաշտպանված են։

    Մեր կայքում տեղ գտած հրապարակումների հեղինակային իրավունքը պատկանում է բացառապես yerkir.am խմբագրությանը։ Այլ ԶԼՄ-ներում սույն կայքի հրապարակումներից որևէ մեկը ամբողջական վերահրապարակելու համար անհրաժեշտ է yerkir.am-ի խմբագրության համաձայնությունը: Լրատվամիջոցները կարող են yerkir.am-ից մեջբերումներ վերահրապարակել միմիայն հատվածաբար` պարտադիր օգտագործելով հիպերհղում:
    Գաղտնիության քաղաքականություն Կայքի հին տարբերակը