Ռուդոլֆ Խառատյանը «սեփական ցանկությամբ» հրաժարվե՞լ է օպերայի թատրոնում իր ստանձնած դերից

Արդեն տեղեկացրել ենք, որ Ալ. Սպենդիարյանի անվան օպերայի և թատրոնի ազգային ակադեմիական թատրոնի որոշ աշխատակիցներ ստորագրահավաք էին կազմակերպել թատրոնի գլխավոր բալետմայսեր Ռուդոլֆ Խառատյանին աշխատանքից հանելու համար` պատճառաբանելով, թե նա պրոֆեսիոնալ չէ:

Թատրոնի փոխտնօրեն Սուրեն Աղաբաբյանը yerkir.am-ի հետ զրույցում հերքել էր այդ փաստը, ՀՀ մշակույթի նախարարությունից նույնպես հերքել էին` նման նամակ նախարարին չեն փոխանցել: Բայց, ինչպես ասում են, ծուխն առանց կրակ չի լինի` թեեւ նամակի գոյությունը հերքում են, բայց դրա արդյունքն այսօր ջրի երես դուրս եկավ:

Yerkir.am-ի հետ զրույցում թատրոնի հասարակայնության հետ կապերի բաժնից Սամվել Դանիելյանը նշեց, որ, որպես գլխավոր բալետմայստեր, թատրոն են հրավիրվել Վիլեն Գալստյանին:

«Գալստյանը մեր բալետային արվեստի երախտավոր,  բալետի փայլուն արտիստներից է, խորեոգրաֆ-բեմադրիչ է: Ռուդոլֆ Խառատյանն իր ցանկությամբ` իր սեփական ցանկությամբ, մնացել է թատրոնում` իբրև հրավիրյալ բալետմայստեր»,- ասաց Դանիելյանը:

Ռուդոլֆ Խառատյանի` «սեփական ցանկությամբ» որոշման հետ կապված մանրամասները կներկայացնենք առաջիկայում: