Օպերայի թատրոնում աուդիտ են անցկացնում` 2013-ի ֆինանսական տվյալներն են ճշգրտում

Օրեր առաջ yerkir.am-ի հետ զրույցում Ալ. Սպենդիարյանի անվան օպերայի և բալետի ազգային ակադեմիական թատրոնի մեներգչուհի Մագդա Մկրտչյանը նշել էր, որ թատրոնում Կամո Հովհաննիսյանի հեռանալուց հետո աուդիտ անցկացնելու պահանջ էր դրվել:

Մարտի 31-ին Ալ. Սպենդիարյանի անվան օպերայի և բալետի ազգային ակադեմիական թատրոնում իր աշխատանքներն է սկսել աուդիտորական կազմակերպությունը:

Yerkir.am-ի հետ զրույցում թատրոնի փոխտնօրեն Սուրեն Աղաբաբյանը տեղեկացրեց, որ սա ամենամյա հերթական աուդիտ է, որը պետք չէ կապել որևէ իրադարձության կամ թատրոնի տնօրենի` աշխատանքից ազատման հետ:

«Մեծ հիմնարկներն ունեն կառավարության որոշում, որի համաձայն` տարեկան մեկ անգամ պետք է անցկացնեն ֆինանսատնտեսական աուդիտ, այսինքն` դա ոչ մեկի պահանջը չէ, օրենքի պահանջն է: Արդեն երրորդ տարին է` հիմնարկը տարին մեկ անգամ անցնում է արտաքին աուդիտ, որի տվյալները հրատարակվում են համապատասխան կայքում կամ ԶԼՄ-ներում: Հիմա մենք հերթական աուդիտի անցկացման նախապայմաններն ենք ստեղծել եւ 2013-ի տվյալներն ենք համակարգում»,- ասաց Աղաբաբյանը:

Նա նշեց նաև, որ աուդիտորական կազմակերպության աշխատանքներն ավարտելուց և դրանք համակարգելուց հետո տվյալները, ամփոփված վիճակում, կհրապարակվեն: