Աստված մեր կողմից էր. օպերայի թատրոնի տնօրենը` նորանշանակ գեղարվեստական ղեկավարի մասին

Աստված մեր կողմից էր. այսօր լրագրողներին ասաց Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն Անդրանիկ Արզումանյանը` խոսելով թատրոնի գեղարվեստական ղեկավար Կոնստանտին Օրբելյանին նշանակելու մասին:

Նա նշեց, որ թատրոնի համար իրականում պատիվ է աշխատել Օրբելյանի հետ, քանի որ նա համաշխարհային համբավ ունեցող մարդ է:

«Նա մեր ստեղծագործական ամենակարևոր օղակներից մեկը կղեկավարի: Ես իմ նշանակման առաջին իսկ օրից շատ եմ ասել, որ թատրոնին գեղարվեստական ղեկավար է պետք: Ցավոք, Գեղամ Գրիգորյանը անժամանակ հեռացավ կյանքից, սակայն կյանքը շարունակվում է, թատրոնը պետք է ապրի»,- ասաց Արզումանյանը:

Նա տեղեկացրեց նաև, որ թեև Օրբելյանը մի քանի օր է, ինչ նշանակվել է գեղարվեստական ղեկավարի պաշտոնում, սակայն արդեն հասցրել է դրսից հայտնի դեմքեր հրավիրել թատրոն` հետագա հնարավոր համագործակցության հետ կապված հարցեր քննարկելու:

Նյու Յորքի «Մետրոպոլիտեն» օպերայի երաժշտական տնօրեն Ջոն Ֆիշերը մեկն է նրանցից, ում Օրբելյանը հրավիրել է Հայաստան: Ֆիշերը նշեց, որ, ճիշտ է, երկու օր է, ինչ Հայաստանում է, սակայն հասցրել է մասնակցել լսումների: «Կուզեի ասել, որ տաղանդավոր մարդիկ շատ կան օպերային թատրոնում, և ամենաուրախալին այն է, որ նրանց մեջ մեծ թիվ են կազմում երիտասարդները: Կարծում եմ` օպերային խոստումնալից ապագա է սպասվում»,- ասաց նա: