Սիրիահայերը ցանկանում են, որ «Հալեպ» թաղամասը կառուցվեր Երեւանում

«Հալեպ» թաղամասում տուն գնելու նպատակով դիմել է 660 սիրիահայ, սակայն մինչև հիմա որևէ մեկը ներդրում չի արել, որպեսզի կառուցվեն շենքերը, իսկ սիրիահայերի մի մասն էլ վստահ չէ, որ շարունակելու է ապրել Հայաստանում: Այս մասին այսօր լրագրողների հետ հանդիպման ժամանակ ասաց «Սիրիահայերի խնդիրները համակարգող կենտրոն» ՀԿ-ի իրավաբան Նաիրա Եդիգարյանը: Նրա կարծիքով` ներդրողները ներդրումներ չեն անում` անորոշությունից վախենալով: Բայց երբ անորոշությունները հաղթահարվեն, և նրանք ներդրումներ անեն, բնակարանների համար դիմած սիրիահայերի 70 տոկոսը կցանկանա գնել այդ բնակարանները:

Նաիրա Եդիգարյանը հիշեցրեց, որ որքան շատ հանգանակություններ լինեն, ու բարերարները գումարներ ներդնեն, այնքան սիրիահայերը մատչելի գնով կկարողանան ձեռք բերել այդ բնակարանները: «Այս բնակարանները սոցիալական չեն, դրանք տրվում են սեփականության իրավունքով: Եվ անհրաժեշտ ներդրումների դեպքում 50 հազար դոլար արժողությամբ բնակարանը սիրիահայերը կարող են գնել 20 հազար դոլարով»,- ասաց իրավաբանը:

«Հալեպ» հայրենակցական բարեսիրական ՀԿ-ի հիմնադիր անդամ Պերճ Քիրազյանը նշեց, որ սիրիահայ երիտասարդներն ավելի հեշտ են ինտեգրվում Երևանի կենտրոնում, եւ հակառակը` դժվար ինտեգրվում ու խոչընդոտների հանդիպում մարզերում, ուստի «Հալեպ» թաղամասում բնակարաններ գնելու ցանկություն ունեցող սիրիահայերի թիվն անհամեմատ ավելի շատ կլիներ, եթե պետությունը տարածքը տրամադրեր Երևանում, այլ ոչ Արագածոտնի մարզում: